Бүгін Мемлекет және қоғам қайраткері Т.Әшімбаевтың туғанына 100 жыл толуына орай салтанатты жиын өтті. Жиын барысында Қазақстанның Құрметті журналисі Карин Ғани Меңтайұлының құрастыруымен жарық көрген «Тұтқабай Әшімбаев» атты естеліктер жинағының тұсаукесері өтті, - деп хабарлайды mangystaumedia.kz сайты.
Еске алу кешіне облыс әкімі С.Трұмов, қоғам қайраткерлері, республикалық жоғарғы оқу орындар бірлестігінің төрағасы, «Тұран» университетінің ректоры Рахман Алшанов, жұбайы Аэлита Оңдасынқызы, Тұтқабай Әшімбайұлының ұлы Құрманғазы атындағы Ұлттық консерваторияның профессоры Бақтияр Тұтқабайұлы мен жұбайы Гүлжан Сабырқызы, немересі Бауыржан Бақтиярұлы және Т.Әшімбайұлымен әр кезеңдерде қызметтес болған еңбек ардагерлері қатысты.
Салтанатты шарада облыс басшысы С.Трұмов сөз алды. Аймақ басшысы алдымен жиналғандарды бүгінгі айтулы мерекемен құттықтады. Содан кейін Т.Әшімбайұлының басшылық еткен жылдарына, түбектегі айтулы оқиғаларды еске алды.
«Тұтқабай Әшімбайұлы облысқа басшылық жасаған жылдары атқарылған істердің бәрін санап шығу мүмкін емес. Аудан мен ауылдың, қала мен ауылдың арасындағы сүрлеулер сара жолдарға айналып, бір-біріне жақындады, бір-бірінен кәсіпке, мақсаткерлікке үйренді. Бұл жылдар – Маңғыстаудың жер асты байлығын игерудің бір арнаға түсіп, болашағында республика бюджетіне донор болып құйылуының бастауы еді. Бұл жылдар – «Аспан астындағы мұражай» атанған Маңғыстаудың мәдени-рухани мұраларының ұлттың рухани қазынасына қосылып, байыта түсуінің де бастауы еді!» - деді С.Трұмов.
Өткенге оралсақ. Т.Әшімбайұлы 1973 жылы жаңадан құрылып жатқан Маңғыстау облысына жетекшілік етуге арнайы тапсырмамен келеді. Аймақты басқарған жеті жыл ішінде қай саланы болмасын тиісті деңгейге көтеріп, ел экономикасы мен тұрғындардың өмір сүру сапасын арттыруға нәтижелі жұмыс істеді. Оның кезінде «Бозашының үш алыбы» атанған Қаламқас, Қаражанбас, Солтүстік Бозашы мұнай кенорындарын игеру басталды. 1970 жылдардың соңына қарай облыс республика бойынша өндірілген мұнайдың 81 пайызын, газдың 96 пайызын және минералды тыңайтқыштың жартысынан астамын өндірді. Қаламқас-Ақтау мұнай құбыры және Жетібай-Ақтау газ құбыры тартылды. Қазақ газ өңдеу зауытының бірінші кезегі, БН-350 атом реакторы іске қосылды. 1980 жылдың қаңтарында Ақтау портынан Қаламқас мұнайы тиелген алғашқы мұнай танкері теңіз жолымен жөнелтілді.
Сондай-ақ шарада Тұтқабай Әшімбайұлымен бірге қызметтес болған қонақтар сөз сөйлеп, естеліктерді еске алды.
Суреттерді түсірген Талант ҚҰСАЙЫН
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
