«Ағайынды Базарбаевтар» атты кітап жарық көрді

Биыл Маңғыстау мұнайының ашылғанына 60 жыл толады. Соған орай, мұнайшылар туралы жаңа кітаптар жарық көріп жатыр. Мұнай саласындағы еңбек өтілін қазақстандық рекорд - 753 жылға толтырған өнегелі әулет өкілдері, ағалы-інілі Тыныштық пен Тоқмағанбет Базарбаевтардың өмірі мен еңбегін үлгі тұту мақсатында Н.Марабаев атындағы «Мұнайшы» қорының демеушілігімен Ү.Жәлеке мен К.Тұманбайұлының «Ағайынды Базарбаевтар» еңбегі 500 дана таралыммен жарық көрді. Осы кітаптың Тоқмағанбет Базарбаевтың 75 жылдық мерейжасымен тұс келген тұсаукесу рәсіміне өзендік бұрғышылар қауымы, тума-туыс жиылды.

Мұнайшы әулет деп сенімді түрде айтуға болатын Базарбаевтар әулеті Жаңаөзен қаласы тұрғындарына жақсы таныс. Олардың көбі Жаңаөзен, Ақтау қалаларындағы мұнай саласына қатысты мекемелерде еңбек етіп келеді. Өйткені олардың алдыңғы буыны кешегі Кеңес Одағы кезінде абыройлы еңбектері үшін кеуделеріне орден таққан ардагерлер болса, кейінгі буыны еңбек жолын жаңа бастап жатқан жастар.

Әулеттің бүгінгі үлкені Тыныштық Белшерұлы ұзақ жылдар бұрғылау саласында еңбек етіп, кейін құрметті еңбек демалысына шыққан ардагер мұнайшы. Жаңаөзен қаласының қоғамдық жұмысына белсене араластып, «Нұр Отан» партиясының қалалық филиалына басшылық жасады. Қазақстан Республикасының Тұңғыш Президенті Н.Ә.Назарбаевтың ел ішіндегі ауызбіршілікті, ұлттар арасындағы достықты насихаттайтын сындарлы саясатын жергілікті жерде жүзеге асыруға күні бүгінге дейін белсене араласып жүрген Тыныштық Базарбаев «Жаңаөзен қаласының Құрметті азаматы» атағының иегері.

Кітаптың екінші кейіпкері Тоқмағанбет Базарбаевқа да Жаңаөзен қаласында орналасқан «Бұрғылау» және «Өзенмұнайгаз» мекемелерінде абыройлы еңбек етіп, туған өлкеміздің гүлденуіне айтарлықтай үлес қосқаны үшін Жаңаөзен қалалық мәслихатының шешімімен «Жаңаөзен қаласының Құрметті азаматы» атағы берілген.

Адал еңбек еткеннің жүзі жарқын, болмысы биік болатындығына Базарбаевтар әулеті нақты мысал бола алады. Базарбаевтар әулетінен шыққан тұңғыш мұнайшы Лесбай Белшерұлының еңбек жолы туралы «Жапырағын жайған бәйтерек» атты көлемді очерк жарияланған болатын.

«Ағайынды Базарбаевтар» атты жаңа кітап осы әулеттің бүгінгі үлкендері Тыныштық пен Тоқмағанбет Белшерұлының және барша Базарбаевтардың тағдыр-талайына арналып отыр. Еңбек ардагерлері, мұнайшы жерлестеріміз жайлы жазылған осындай еңбектер қаламыздың жылнамасын толтыруға қосылған үлес екендігі анық.

Кітаптың алғашқы бөлімі бүкіл саналы ғұмырын Өзен кен орнының өркендеуіне, оның ішінде бұрғылау саласына арнаған Тыныштық Белшерұлының жүріп өткен жолы, атқарған қызметі туралы сыр шертеді. Ғұмыр сапарының ұзақ жолын абыроймен жүріп өткен Тәкеңнің абыз келбетін, батыр болмысын ашып, оның өмір сүрген замана тынысы, ортасы және замандастарының бет-бейнесінің жақыннан жарқырай ашыла түсуіне барынша ден қойған.

Екінші бөлім Тыныштықтың туған інісі Тоқмағанбет Базарбаевтың жүріп өткен жолына арналған. Мұнайшылар әулетін ұлықтай отырып, Өзеннің кешегісі мен бүгінінен, Өзен Бұрғылау басқармасының құрылу, қалыптасу, өсіп-өркендеу тарихынан дерек беретін, өзегіне өзендік бұрғышылардың қиын да күрделі еңбек жолын арқау еткен кітапта сонымен қатар, әулет туралы естеліктер мен қысқа-нұсқа дерек-дәйектер де орын алған.

Үміт ӨЗЕН