Міндетті әлеуметтік медициналық сақтандыру (МӘМС) жүйесі енгізілгелі жиі қойылатын бұл сұрақты «Әлеуметтік медициналық сақтандыру қоры» Маңғыстау филиалы ақпараттандыру бөлімінің бас сарапшысы Сәуле Наушинаға қойған едік.
- Өткен жылдың 1 қаңтарынан бастап Міндетті әлеуметтік медициналық сақтандыруды жүзеге асыру басталғаны белгілі, – деді ол. – МӘМС жүйесі жарна мөлшеріне қарамастан, барлық сақтандырылған адамдардың қызметтер пакетіне тең қолжетімділігіне негізделген. Бұл ретте МӘМС бойынша көмек алу үшін жүгінген кезде пациент медициналық қызметтердің көлемі мен құнын шектемейді. Қазіргі уақытта медициналық қызметтер екі пакет бойынша көрсетіледі. Бұлар – тегін медициналық көмектің кепілдік берілген көлемі шеңберінде (ТМККК) және міндетті әлеуметтік медициналық сақтандыру жүйесінде (МӘМС). Бұл бағыттағы жұмыстар 2021 жылы да жалғаса береді. Бү гінгі таңда қазақстандықтарда медициналық сақтандыру үшін кімге, қайда және қалай төлеуге болатыны туралы сұрақтар толғандырып отырғанын білеміз. Сондықтан Медициналық сақтандыру жүйесіндегі өз мәртебеңізді ыңғайлы тәсілмен тексеруді ұсынамыз. Ол үшін Әлеуметтік медициналық сақтандыру қорының fms.kz ресми сайты арқылы оң жақтағы төменгі бұрыштағы қалқымалы жасыл шеңберді басып, ЖСН енгізіңіз, egov.kz электронды үкімет порталы арқылы жеке кабинетте және «Денсаулық сақтау» бөлімінде, Telegram-дағы Saqtandyru-bot арқылы басты мәзірде «Сақтандыру мәртебесін анықтау», Qoldau 24/7 мобильді қосымшасы арқылы басты мәзірде «Сақтандыру мәртебесін анықтау».
– Ал МӘМС үшін қанша төлейді?
– Егер сіз МӘМС жүйесінде сақтандырылмаған болсаңыз, жарна төлеуші санатына қарай МӘМС үшін ай сайын төленетін жарна мөлшерін анықтап аласыз. Азаматтардың 15 жеңілдігі бар санаты үшін жарнаны мемлекет төлейді. Жалдамалы жұмыскер үшін жұмыс беруші бухгалтериясы жалақының 2% мөлшерінде және жалақы қорынан 2% мөлшерінде төлем жасайды. Жеке кәсіпкерлер, шаруа қожалығы иелері, жеке практикамен айналысатын тұлғалар 1,4 ең төменгі жалақының 5% мөлшерінде төлейді. Ең төменгі жалақы – 2021 жылы да 42 500 теңге. Сондықтан төлем мөлшері – бұрынғыдай 2 975 теңге. Өзін-өзі жұмыспен қамтушылар, яғни жеке кәсіпкер ретінде тіркелмеген, жалдамалы жұмыскерлері жоқ, қызмет көрсететін адамдар, бірыңғай жиынтық төлем төлеушілер – 1 АЕК (01.01.2021 ж. 2 917 теңге) республикалық және облыстық маңызы бар қалалар үшін. Басқа елді мекендер үшін 0,5 АЕК (01.01.2021 ж. 1 458,5 теңге). Дербес төлеушілер 1 ЕТЖ-ның 5% мөлшерінде төлейді. Биыл да ең төменгі жалақы өзгермегендіктен, 2 125 теңге болып тұр. Азаматтық-құқықтық негізде шарт бойынша жұмыс істейтіндер – табысының 2% мөлшерінде, ең жоғарғы төлем 8 500 теңге, яғни 10 ЕТЖ-ның 2%-ы. Ал екінші деңгейлі банктер және олардың интернет-сервистері арқылы; Kaspi.kz мобильді қосымшасы арқылы; «Қазпошта» АҚ бөлімшелері арқылы; төлем қабылдау терминалдары (Qiwi, Kassa24 және т.б.) арқылы; медицина ұйымдарындағы төлем қабылдау терминалдары арқылы МӘМС үшін төлем жасауға болады.
Валентина ҚОЗЫБАҚОВА
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
