Облыста дәрі-дәрмек қорын тұрақтандыруға 300 млн теңге бөлінді

Маңғыстау облысы әкімінің тапсырмасына сәйкес «Каспий» әлеуметтік кәсіпкерлік корпорациясы арқылы өңірге қажетті дәрілер сатып алынды. Дәрі-дәрмектерді алуға бюджеттен 300 млн теңге бөлінді, - деп хабарлайды mangystaumedia.kz сайты.

Қажетті дәрі-дәрмектерді өңірдегі өзге де дәріханаларға тарату үшін ірі «Фаиз» және «АДА-фарм» компаниясымен келісім шарт жасақталды. Қазіргі таңда үшінші компаниямен келісімдер жүргізіліп жатыр.

«Дәрі-дәрмек қорын тұрақтандыру үшін екі компанияға 200 млн теңге берілді. Әзірге соның 60 млн теңгеге қажетті 38 бағыттағы топтық дәрі сатып алынды. Жергілікті ірі «Фаиз» және «Ада-фарм» компаниясы аймақтағы 400-ден аса дәріханаға таратады», - дейді «Каспий» әлеуметтік кәсіпкерлік корпорациясының директоры Абзал Меңдібаев.

Бұл дәрілер коронавирустың және күз, қыс мезгілдерінде асқынатын аурулардың алдын алу үшін алынды. Дәрілердің бағасы шектік бағадан аспайды.

«Бұл дәрі-дәрмектердің «СК Фармация» жеткізетін дәрі-дәрмектерге еш қатысы жоқ. «СК Фармация» емханалар мен ауруханаларды дәрімен қамтамасыз етеді. Ал облыс әкімінің тапсырмасымен алынып жатқан дәрілер тек аймақтағы дәріханаларға ғана жеткізіледі», - дейді Абзал Меңдібаев.

Айта кетейік, алдағы уақытты эпидемиологиялық жағдайға және сұранысқа қарай дәрі-дәрмек алу жұмыстары жалғасады.

Жұлдызай ҚАЛИЕВА

Суреттерді түсірген Талант ҚҰСАЙЫН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.