Атақты гроссмейстер Динара Сәдуақасова "Маңғыстау-Медиаға" келді

Әйелдер арасында әлемдік гроссмейстер әрі әлем чемпионы сондай-ақ, Азия чемпионы, әлемнің 4 дүркін чемпионы қазақстандық шахматшы Динара Сәдуақасова "Маңғыстау-Медиаға" арнайы келді, - деп хабарлайды mangystaumedia.kz.

24 жастағы Динара Сәдуақасова биыл әлемнің үздік 10 шахматшысының қатарына енген еді. Қазақстан мен Орталық Азиядағы шахмат тарихында алғаш рет ЭЛО рейтингінде 2500 көрсеткішінен асып кеткен алғашқы қазақстандық шахматшы "Маңғыстау-Медиа" қызметкерлерімен жүздесіп, журналистердің сұрағына жауап берді.

Динара Маңғыстауға келген сапарындағы басты мақсаты Бекет ата басына зиярат ету екенін атап өтті. Жас гроссмейстер бұл киелі мекен өзіне ерекше бір күшпен тартатынын айтты.

Динара ЮНИСЕФ-тің ерікті елшісі, орыс және қазақ тілдеріндегі «Шахматтағы алғашқы қадамдар» және «Шахмат ойнап үйренейік» кітаптарының авторы.

«Баланы қай жастан жастап бастап шахматқа берген дұрыс?» деген сұраққа жауап бере отырып, "Маңғыстау-Медианың" журналистерімен бір партия шахмат ойнады.

«Әрбір бала ерекше. Әрқайсысының шахматты бастауға өз жасы, қабілеті бар. Ал біз академияға балаларды 5 жастан бастап қабылдаймыз. Өйткені бұл жаста бала түсінуге қабілетті, сондай-ақ шахматты тануға қызығушылығы пайда болады. Бастысы баланың тренері, педагогі мықты болуы керек. Мысалы, кейде адамдар шахматты жақсы ойнағанымен, бірақ педогог ретінде өзін жақсы көрсете алмай жатады. Сондықтан біз академияға балалармен жұмыс істей алатын және өз білгенімен бөлісе алатын педогогтарды аламыз», - деді ол.

Сонымен қатар Д. Сәдуақасова шахматтың басқа спорттардан ерекшелігі сол, бұл спортта жас шектеуі жоқ екенін басты назарға алып айтты.

«Кез келген жаста шахматты үйренуге болады. Шахмат өте пайдалы спорт түрі. Бұл спорт түрі логиканы дамытып, адамды шыдам мен төзімділікке, аналитикалық ойлауын жақсартуға көп көмектеседі», - деді шахматшы.

Журналистердің әзіл-қалжыңы аралас "Сіз миллионерсіз бе?" деген сұрағына Динара "Жоқ, бірақ мен үшін халқымның қошеметі мен қолдауынан асқан байлық жоқ" деп күлімдеп қана жауап берді.

Сөз соңында Динара "Маңғыстау-Медиа" ұжымын жаңа ғимаратқа көшуімен құттықтап, жаңа орында шығармашылық табысқа жетуді тілеп, кездесуді ұйымдастырған Айсұлу Қабышқызына алғысын білдірді.

Аты әлемге әйгілі жас шахматшы ең алғашқы белесін 7 жасында вице чемпион атанып бағындырған еді. Ең қызығы, Динара Рамазанқызы тек шахматтан ғана үздік емес, сонымен қатар музыкалық мектепті үздік тәмамдаған, көркем гимнастикадан «Синегорье» халықаралық турнирінде бірінші орын алған.

Айта кетейік, әлемдік гроссмейстер пандемия кезінде барлық ниетті жанға шахмат акедемиясынан онлайн тәлім алуға мүмкіндік берді. Динара Сәдуақасова атындағы Онлайн шахмат академиясының алаңында чемпионның өзі дайындаған сабақтар мен тапсырмалар бар.

Динара Сәдуақасова әпкесімен

Махаббат НҰРЖАНҚЫЗЫ

Суреттер мен бейнежазбаны түсірген Талант ҚҰСАЙЫН, Ақерке ГАГАРИНҚЫЗЫ