FlyArystan: Ақтау – Ақтөбе бағытында рейс ашылды

16 қазан күні FlyArystan-ның жетінші борты алғаш рет Ақтау–Ақтөбе бағытында ұшты. Ұшаққа сәтті рейс нөмірі КС 7777 берілді. Алғашқы рейспен 168 адам Ақтөбеге ұшып барды, - деп хабарлайды mangystaumedia.kz сайты.

Бұған дейін әуекомпания арқылы Каспий теңізіне Алматы, Нұр-Сұлтан, Қарағанды, Атырау және Шымкент қалаларынан ұшып келетін еді. Енді ақмаржан қалаға Ақтөбе халқы да бір жарым сағат ішінде жететін болды. Әуелайнер 180 орынға арналған. Билет бағасы 6 999 теңгеден басталды. Бұл – тек билет пен 5 келі қолжүктің құны. Ал қосымша қызметтерге бөлек ақы төленеді.

Тұрақты рейстер заманауи Airbus A320 ұшақтарымен қатынайды. Сондай-ақ жолаушылар үшін ақылы ас мәзірін ұсынады. Сатып алу арнайы банк карточкасы арқылы немесе қолма-қол ақшалай жүргізіледі.

Ал FlyArystan әуекомпаниясы баспасөз қызметінің айтуынша, бірінші отандық лоукостердің мақсаты – тиімді әрі қолжетімді қызмет ұсыну. Әр адам өз қажеттілігіне қарай әуекомпания ұсынған тарифтерді пайдалана алады. Ал ұшақ ішінде тағам алмаймын, жүк салмаймын десе онда оған қосымша ақша төлемейді. Бәрі де жолаушының таңдауы мен қажеттілігіне байланысты.

FlyArystan ел ішінде жиі қатынайтын ұшақ болғандықтан сұраныс көп. Аталған әуе кемесімен егде жастағы адамдардың да жиі ұшатынын байқадық. Айта кетейік, Ақтау – Ақтөбе бағытындағы рейс аптасына 4 рет, яғни дүйсенбі, сәрсенбі, жұма және жексенбі күндері қатынайды.

«Биыл тамызда Ақтауға қатынайтын жолаушылар саны өткен жылдың шілде айымен салыстырғанда 120 пайызға артқан. Өз тарапымыздан бар мүмкіндіктерді пайдаланып, елдің батыс өңірлеріне одан да көп орынды ұсынуға дайынбыз», - дейді лоукостердің баспасөз қызметі.

Жұлдызай ҚАЛИЕВА

Суреттерді түсірген Талант ҚҰСАЙЫН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.