Мал азығының бағасы тұрақты ма?

© Талант ҚҰСАЙЫН

Ауданда несібесін қорадағы төрт түлігінен тауып отырған жандар қаншама?! Мал басын асылдандырып, көпшілігі аздаған малын асырап, аузы аққа тиіп, құрт-майын жеп отыр. Иә, малды өріске айдап, түрлі кеселдің алдын алып, күтіп-баптағаннан бөлек, оның азығы да біраз шығынды талап етеді. Бүгінде төрт түліктің қамын ойлаған аудан жұртшылығы мал азығының бағасы арзандағанын қалайды.

– Қорада 4-5 бас ірі қара малым бар. Қыстың қамын ойлаған қазақпыз ғой, жыл сайын мал азығына жаздың соңғы айларында қолжетімді бағамен жем-шөбін аламын. Жақында ғана жемнің келісін 1200 теңгеден алдым. Бұл — әрине, қымбат. Бала-шағаның несібесіне қарай малдың қыстан аман шыққаны жақсы ғой. Ол үшін азығы сапалы болуы керек. Бағасы шамалы арзандағанын қалаймын. Еттің құны да осы малдың азығына тікелей байланысты, – дейді Қосбұлақ ауылының тұрғыны Р.Өтеғұлов. Бұл - бір ғана емес, барша қорасында азды-көпті жандығы бар тұрғындардың тілегі. Аудан әкімінің жыл қорытындысында берген есеп беру кездесуінде де бұл сұрақ қойылып жүрді.

Мамандардың мәліметіне қарасақ, 2019 жылғы есеп бойынша ауданда 8253 бас мүйізді ірі қара, 25162 бас түйе, 38640 бас жылқы, 153892 бас қой-ешкі бар. Соның ішінде бүгінгі таңда халықтың жылқы мен түйе өсіруге деген назары ерекше. Жыл өткен сайын мал басы да едәуір артып келеді. Бірақ қанша көбейгенімен, еттің бағасы қымбаттамаса, арзандайтын түрі жоқ. Оған себеп – жоғарыда айтқан мал азығының қымбаттауы. Осы сауалмен аудандық ауыл шаруашылығы бөлімінің басшысы Б.Әбуовке барған болатынбыз.

«Биылғы жылы мал азықтық шөп дайындауға 27000 тоннаға жоспар жасалынып, 100% орындалды. Бүгінгі таңда кәсіпкерлер қоймасында 700 тонна жем қоры сақталған. Жем-шөпті әкелетін жеке кәсіпкер, ал жеке кәсіпкерге мал азығының бағасын мынадай бағада сат деуге біздің құқығымыз жоқ, тұрақты баға көрсеткіші де жоқ. Тұтынушы өз құқығын қорғауға тиісті. Жалпы алғанда, келетін мал азығының өзіндік мемлекеттік нөмірі, салмағы, дайындалған күні, барлығы көрсетілуі керек. Ал енді оны алатын ауыл шаруашылығы техникасының қосалқы бөлшегі, оның жанар жағар майы жылдан-жылға қымбаттап жатыр. Мал азығын дайындауға үкіметтен ешқандай субсидия берілмейді. Кейбір ауылдарда шөпті жақын жерлерден емес, қырдан шабу керектігін айтып жатады. Бірақ айта кететіні, шөп шабу қашықтаған сайын оны жеткізіп, дайындау шығыны өнімнің өзіндік құнын ақтамайтындығына байланысты», - дейді.

Жыл өткен сайын жем-шөпке сұраныс көбеймесе, кемімейді. Ал оның бағасының тұрақты болуы көптеген қарапайым тұрғындардың тілегіне айналып отыр. Жалпы ауыл шаруашылық саласы бойынша облыс көлемінде алдыңғы орында тұрған аймақта мал азығы жөнінде мәселе болмауы қажет секілді. Алдағы уақытта тиісті бөлімдер жоғарыда аталған мал азығының қолжетімді бағада тұрақтап тұруына ықпал жасаса екен дейміз.

Д.УТЕПБЕРГЕНОВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.