Тұрғындар – басты назарда

Жуырда облыс әкімі С.Трұмовтың қатысуымен Маңғыстау ауданының әкімі Т.Көшмағанбетовтің халық алдында қорытынды есеп беру жиыны өтті. Аудандық мәдениет үйінде өткен жиынға облыс, аудан активі, депутаттар, қоғамдық кеңес, ардагерлер кеңесінің мүшелері, құқық қорғау органдары мен аудан әкімдігінің бөлім, мекеме басшылары, ауылдық округ әкімдері, қоғамдық ұйымдар, жастар өкілдері, әлеуметтік сала мамандары және аудан тұрғындары қатысты.

Жиынды аудандық мәс­лихат хатшысы А.Сарбалаев ашып, «ҚР Президентінің орталық атқарушы органдар басшыла­рының, әкімдердің, ұлттық қо­ғамдық жоғары оқу орындары ректорларының халыққа есеп беру кездесулерін өткізу туралы» 2016 жылғы 5 ақпандағы жарлығына сәйкес барлық деңгейдегі әкім­дердің халық алдындағы есеп беру кездесулері өткізілуде. Аудан әкімі Т.Көшмағанбетовтің тұрғындар алдындағы есеп беру кездесу­лері қаңтар айының ішінде ауыл орталықтарында және аудандық қоғамдық кеңес алдында өтті. Аталған жарлыққа сәйкес 2019 жылғы ауданның әлеуметтік-­экономикалық даму қорытындысы және алда тұрған міндеттері туралы аудан әкімі Т.Көшмағанбетовтің есептік баяндамасы тыңдалды.

Алдымен аудан әкімі Т.Көшмағанбетов өткен жылы атқарылған ауқымды жұмыстарды жан­-жақты баян­дап берді. Баяндамадан бір жылдық белесте бірша­ма жұмыс атқарылғанына жиналғандар куә болды. Ел экономикасының ілгері басуының арқасында ауылдарды абаттандыру, көріктендіру, жарықтандыру жұмыстары жібін үзбей жалғасып жатқандығы айтылды. Десе де ел тұрмысының жақсарып, ауылдардың көркеюінде әлі де бол­са атқарылар іс аз емес.

Аудан әкімінің баяндамасынан кейін жарыссөзге шыққан аудандық ардагерлер кеңесінің төрағасы А.Ертілеуов төрт мыңдай халқы бар ескі Шетпе елді мекенінен амбулато­рия салу, екі қатарлы пойыз жол өткелін кеңейту мәселесін қозғады. Ал қоғамдық кеңестің мүшесі Ө.Жайлаубай

«Аудандағы және ауыл ішінде қордаланып қалған қоқысты бір реттік сенбілік жұмыстары мен тазалық шаралары­нан бітетін іс еместігі анық, аудандағы тазалық мәселесіне облыстық бюджеттен қоқыстан толық тазаратындай қылып қаржы бөліп, әрбір көшеге қоқыс салатын арнайы жәшіктер орнатылса» деген ұсынысын айтты. Сондай-­ақ спорт саласының ардагері С.Тілегенов сөз алып, Шайыр ауылына қарасты, жайлауы кең, малға суы тегін Тиген елді мекеніне көгілдір газ құбырын тартып беруді және спорт саласындағы жетістіктері жоғары ауданымызға ардагерлер­ге арналған заманауи спорттық сауықтыру кешені салынса деген ұсынысын айтып, аудан әкімінің бір жылдық еңбегін оң бағалады. Сонымен қатар қорытынды есепке қатысқан тұрғындар тарапынан Қосбұлақ ауылында орналасқан

мәдениет үйіне жөндеу жұмыстарын жүргізу, елді мекеннен мектеп пен балабақша салу, шалғай ауылдарға қатынайтын көліктің тапшылығы, Онды ауылынан газ құю бекетін салу және М.Атымов атындағы орта мектепке күрделі жөндеу жұмыстарын жүргізу, сондай-­ақ Жармыш ауылының тұрғыны Б.Бекмағанбетов «Бейнеу бағытындағы жолда мал айдап өтетін жер қарастырылмаған, соған байланысты мүмкіндігінше мал айдап өтуге ыңғайлы күре жол салып бе­руді» сұраса, көп балалы аналар қоғамдық көлікте жүруге және балабақша төлемдеріне жеңілдік жасау, сондай-­ақ Ақшымырау ауылының тұрғыны Қ.Серіков ауылдан мал шаруашылығына арналған су ұңғымаларын орнату сияқты түскен ұсыныс­-тілектер толық назарға алынды.

Ел ішіндегі кейбір мәселелерді назарға берген ауыл тұрғындарының ұсыныстары бойынша түскен талап-тілектерге жеке-­жеке тоқталған облыс әкімі С.Трұмов тиісті сала басшыларына тапсырма беріп, аудан көлемінде шешімін табатын мәселелерді Т.Жеткізгенұлының назары­на ұсынды. «Елдің іші болған соң түрлі мәселелер болады, ал сол мәселелерді нақты іспен шешу – біздің міндетіміз. Себебі бүгінгі кездесуде Мемлекет басшысының бізге қойып жатқан талабы – халықпен ашық мемлекет құру және халықтың үніне құлақ түру. Мемлекет басшысының айқындап берген бағыттарын басшылыққа алып, өңірімізді одан әрі дамыту жолында қызметтене беретін боламыз», – деді өңір басшысы.

Халық алдында есеп беру кездесуінен кейін аудан әкімдігінде өңір басшысы аудандағы қоғам белсенділерімен кездесті. Еркін форматта өткен кездесуде ауыл азаматтары аудандағы шешілуі тиіс мәселелер туралы ашық пікірлерін, ел әлеуетін көтеру жолындағы ортақ ұсыныстарын жеткіз­ді. Ортақ мүдде – ел болашағы сөз болған кездесуде облыс әкімі әрбір ұсыныстың құнды екенін айтты.

Д.ӨТЕПБЕРГЕН,

М.ЖЕБЕҚЫЗЫ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.