Сенат депутаттары Маңғыстауға келді

Бүгін Маңғыстау облысына ҚР Парламенті Сенатының депутаттары іссапармен келді. Негізгі мақсаты – ішкі туризмді дамытуда атқарылып жатқан жұмыстармен танысу. Сондай-ақ саланың даму жолындағы кедергілерді талқылайды, - деп хабарлайды mangystaumedia.kz сайты.

Сенаторлар сапарының алғашқы күні Әбіш Кекілбайұлы атындағы Маңғыстау облыстық тарихи-өлкетану музейінен басталды. Депутаттар алдымен Әбіш ескерткішіне гүл шоғын қойып, мұражайды аралап, тарихи жәдігерлермен танысты.

«Келесі жылы Сенат отырысында ішкі туризмді дамытуға қатысты парламенттік тыңдау өтеді. Осыған орай бірнеше өңірді аралауды жоспарладық. Сапарымызды Маңғыстаудан бастадық. Себебі, Маңғыстаудың ішкі туризмді дамытуда алатын орны ерекше. Біріншіден, теңіз бар. Екіншіден, әулие Бекет атамыз осында жатыр. Үшіншіден, осы уақытқа дейін туризм саласы бойынша біршама іс атқарылды. Әрі қарай туризмді қарқынды дамыту үшін ертең арнайы жиналыс өткіземіз. Жиында өңірде атқарылып жатқан жұмыстарды саралап, кемшің тұсын талқылап, заңға қажетті өзгерістерді енгізу мақсатында ұсыныс-пікірлерді тыңдаймыз», - дейді сенатор, Әлеуметтік, мәдени даму және ғылым комитетінің төрағасы Мұрат Бақтиярұлы.

Ертең Сенат депутаттары жоспар бойынша өңірдегі бірнеше нысанды аралайды. Ал сенбі күні Бекет ата, Шопан ата жер асты мешіттеріне және Бозжыраға баруды жоспарлап отыр.

«Бозжыраға да қатысты мәселенің бар екенін білеміз. Бозжыраны сақтау керек, дегенмен туристер үшін көз тартар табиғи орындарды көруге жағдай жасалғаны дұрыс. Әрине, оның бәрі белгілі бір тәртіппен орындалуы керек. Туризмді жақсы дамытатын нәрсе – қонақ үй бағасы, екінші кезекте – жол. Сондықтан инфрақұрылымды оңтайландыру маңызды. Осы екі мәселені шешетін болсақ, онда елге 10 миллиондаған адам саяхаттап келетіні анық», - дейді сенатор Мұрат Бақтиярұлы.

Сонымен қатар ол тек туризм ғана емес, денсаулық сақтау, білім беру саласына қатысты мәселелерге көңіл бөлінетінін айтты.

Жұлдызай ҚАЛИЕВА

Суреттерді түсірген Талант ҚҰСАЙЫН