Маңғыстау облысындағы қуаңшылық мәселесін шешу үшін өңір қазынасынан 200 млн теңге бөлінді. Бұл туралы Ауыл шаруашылығы басқармасының басшысы Серік Қалдығұлов мәлім етті, деп хабарлайды mangystaumedia.kz сайты ҚазАқпаратқа сілтеме жасап.
Оның айтуынша, шілде айынан бастап 5 ауданға азық сатып алынады.
«Келесі айдан бастап жыл соңына дейін Маңғыстау облысының 5 ауданына 2200 тонна азық сатып алынады. Бөлінген қаржы «Каспий«ӘКК арқылы игеріледі. Ал көрші өңірлердің жекеменшік иелері 15 маусымнан бастап шөп жеткізуге дайын», - деді Серік Қалдығұлов.
Облыс әкімінің тапсырмасы бойынша, шаруа қожалықтары үшін жем-шөп дайындау науқаны жедел басталды.
Аймақ әкімдігі Қостанай, Батыс Қазақстан және Ақтөбе облыстарымен жем-шөп жеткізу, сондай-ақ жайылымдар мен шабындықтарды пайдалану жөнінде келіссөздер жүргізуде. Ақтөбе облысының аудандарымен келісімдер бар. Олар – Ақтөбе облысының Алға, Байғанин, Мәртөк, Мұғалжар, Қобда, Темір аудандары.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
