«Маңғыстауда анар өсіру» ғылыми жобасы авторлық куәлік алды

Ақтау қаласындағы Назарбаев Зияткерлік мектебінің биология пәні мұғалімі мен 9-сынып оқушылары Алмаз Нұржанов, Алина Чернякованың «Маңғыстаудағы экстрааридті табиғи-климатты жағдайда қарапайым анар өсіру» ғылыми жобасы авторлық куәлік алды, - деп хабарлайды mangystaumedia.kz сайты.

Ғылыми жобаның басты мақсаты - шөлді Маңғыстау топырағына отырғызылған қарапайым анардың түрлі қоспалар мен тыңайтқыштарға әсерін зерттеп, өсу кезеңдеріне сынақ жүргізу.

Эксперименттер мен бақылаудың нәтижесінде жоба авторлары Маңғыстау топырағы мен ауа-райы анардың өсуіне мүмкіндік беретіндігін анықтаған. Осылайша оқушылар өңірдегі ауыл шаруашылығының дамуына үлес қосқысы келеді.

Алина мен Алмаз анар тұқымдарын мектеп жылыжайына отырғызып көрген. Кейін бір жыл бойы өсімдіктің морфологиялық белгілеріне фенологикалық бақылау жүргізіп, оның өсу жылдамдығына және тыңайтқыштарды қосу барысындағы реакцияны сараптаған. Барлық сараптаманы талқыға салып, нәтиже шығарған.

"Бұл зерттеу жұмысының тәжірибеде өзектілігі өте жоғары деп есептейміз. Оқушылар алдағы уақытта отырғызған ағаштарын бақылап, оларға күтім жасаудың агротехникалық жолдарын меңгеріп, Маңғыстау облысындағы фермерлерге анар отырғызып көруді ұсынғылары отыр", - деді жоба жетекшісі Гүлжан Нүсіпжанова.

Жас зерттеушілердің сөзіне сүйенсек, ағаштар қазір Маңғыстау жеріне жерсіну процесі жүріп жатыр. Егер сынақ сәтті жүзеге асса бұл ағаштар 4-5 жылдан кейін жеміс бере бастайды.

"Мені биология мен ботаника 7-сыныптан бастап қызықтыра бастады. Нәтижесінде әртүрлі олимпиадалар мен конкурстарға қатыса бастадым. Былтыр бізге ұстазымыз осы идеяны ұсынған кезде қуандық. Өйткені өңірде жеміс ағаштарын отырғызу, жалпы көгалдандыру мәселесі өте өзекті болып тұр", - дейді Алмаз Нұржанов.

Жас ботаниктер алдағы уақытта зерттеу жұмыстарын жалғастырып, Маңғыстаудағы ерекше жеміс ағаштары отырғызылған бақты жүзеге асырғысы келеді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.