Жазғы маусым басталған сәттен-ақ Мұнайлы тұрғындары су тапшылығын сезінеді. Биыл да аудан халқының аталған мәселемен бетпе-бет келетіні анық. Мұны жергілікті әкімдік те жоққа шығармайды. Десе де аудан әкімдігі ауыз су беруді оңтайландыру үшін тиісті шаралардың орындалып жатқанын айтады. Осы ретте БАҚ өкілдері Мұнайлы ауданына барып, су тапшылығының алдын алу мақсатында атқарылып жатқан жұмыстармен танысып қайтты.
Әкімдік ауыз су жетіспеушілігінің басты себебін аудан халқының жыл сайын өсуімен байланыстырады. Қазір ауданда 174 мыңнан аса тұрғын бар. Қыста ауыз судан қиындық көрмейді, ал жаз басталса тұрғындардан түсер шағым да еселенеді.
«Бізге жаздыгүні су жетпейді. Бір жылдан бері басты проблемамыз су болды. Оның алдында ауыз су жететін еді, қазір тек тапсырыспен сатып алып жүрміз. 4 мᶾ водовозға 2500 тг төлейміз, оны 2 айдай пайдаланамыз. Ал жазғы маусымда бір водовоз суды жеткізу тіпті қиын», - дейді Басқұдық елдімекеннің тұрғыны Айсұлу Қожанова.
Әкімдіктің айтуынша, Мұнайлы ауданын жазғы маусымда ауыз сумен тұрақты қамтамасыз ету үшін тәулігіне 34 980 мᶾ су қажет.
«23 480 мᶾ жеке тұлғалардың, ал заңды тұлғалардың қажеттілігі үшін 11 500 мᶾ су керек. Алайда аудан халқы «Каспий» су тұщыту зауыты тәулігіне берген 9000 мᶾ ауыз суды қанағат етіп отыр. Қазіргі таңда зауыттың өнімділік қуатын тәулігіне 24 000 мᶾ-ке дейін арттыру бойынша жұмыстар жүргізіліп жатыр. Егер зауыт толық қуаттылықта жұмыс істейтін болса, Мұнайлы ауданына берілетін ауыз су 16 000 мᶾ-ке дейін артады», - дейді Мұнайлы ауданы әкімінің орынбасары Нұрлыбек Жолбаев.
Қазіргі таңда Басқұдық ауылын ауыз сумен қамтамасыз ету үшін ЦУВС-4 жанына тәулігіне 500 мᶾ су құю пунктін ашу жұмыстары жүріп жатыр. Жұмыстың 95 пайызы аяқталған, мамыр айында ашуды жоспарлап отыр. Сол сияқты 43 мың халқы бар Атамекен ауылынан МАЭК ауыз су құбырының бойынан тәулігіне 500 мᶾ су құю пункті ашылады.
Содан соң Баянды ауылына барып, онда салынып жатқан мембраналық қондырғы жұмысымен таныстық. Баянды халқы басқа ауылдарға қарағанда ауыз сумен жеткілікті деңгейде қамтылған. Дегенмен әзір босаңсуға болмайтынын ескеріп отыр. Сол себепті де жазға дейін «Құйылыс-Ақтау» су құбыры арқылы тәулігіне 4000 мᶾ ауыз су тұщытатын мембрананы іске қосуды жоспарлаған. Сондай-ақ сыйымдылығы 4 200 литрден кем болмайтын 20 су тасуға арналған автоцистерна сатып алу жұмыстарын ұйымдастыруда.
«Биыл наурызда ауыл ішіндегі су тұщытатын мембраналық технологиялар іске қосылғаннан кейін Баянды ауылы «Каспий» су тұщыту зауытынан ажыратылды. Қазіргі таңда мембраналық цех тәулігіне 700 – 800 мᶾ су беріп тұр. Сол суды Баянды 1 мен 2 –ге бір күн Баянды 3-ке бір күн беріп отырмыз. Ал жазда Баянды ауылының тұрғындарына 1000 мᶾ су қажет болады», - дейді Баянды ауылының әкімі Дастан Мұраталиев.
Ауыл әкімінің айтуынша, салынып жатқан мембрана іске қосылып, тәулігіне 4000 мᶾ су тұщытқан жағдайда Баянды, Дәулет ауылдары мен «Бесшоқы» тұрғын үй массивін ауыз сумен қамтуы мүмкін. Ал аталған ауылдардан үнемделген ауыз су Маңғыстау ауылы мен «Ақеспе», «Бозжыра», «Айрақты» және «Шерқала» тұрғын үй массивтерінің қажетіне пайдаланады.
Мұнайлы әкімдігі осылайша ауыз судан шығатан шуды басуға ерте әрекет етіп жатыр. Егер әкімдіктің ойға алғаны өз деңгейінде орындалса, онда халық ауыз судан, жергілікті билік шудан зардап шекпейтіні анық.
Жұлдызай ҚАЛИЕВА
Суреттерді түсірген Талант ҚҰСАЙЫН
Баянды ауылындағы мембраналық қондырғы
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
