Ауыл сәулеті - аймақ келбеті

Туған өлкеде игі үрдістер мен өркенді өзгерістердің орнығуына оң ықпал етуде елжанды азаматтардың үлесі орасан. Ауыл келбетінің күн санап көркейе түсуі, оның аумағында әр алуан әлеуметтік нысандардың бой көтеруі, тұрғылықты халықтың игілігіне жарайтын жасампаз жобалардың жүйелі әрі жемісті жүзеге асуы осындай жанашыр жандардың табанды еңбегінің нәтижесі деп білеміз. Жаһандану үрдісі дендеп енген бүгінгі қоғам өмірін толассыз өзгерістер мен жаңғыруларсыз елестете алмаймыз. Ал мұндай кезеңде уақыт талабына сәйкес кәсіби білім-білігін үздіксіз жетілдіріп, заман ағымына кедергісіз бейімделуге қабілетті жандар ғана ел игілігіне еселі қызмет ете алмақ. Сондай азаматтар арасынан бүгінде Түпқараған аудандық мәслихатының депутаты, кәсіпкер Джулдибаева Балғаным есімін ерекше атаймыз.

Балғаным ханым өзі өсіп-өнген өңірдің өркендеуі мен өрлеуіне титімдей үлесін қосуды перзенттік парызы санайты саналы әрі ізгі ойлы жан. Ол бүгінде ҮЕҰ, жергілікті атқарушы органдармен бірлесе біршама жаңа жобалардың жүзеге асуына жетекшілік етіп келеді. Соның ішінде көпбалалы және тұрмысы төмен, көмекке мұқтаж, мүжәлсіз отбасыларды әлеуметтік қолдау бағытында бірқатар іс-шараларды ұйымдастырды. Мұндай ізгі дүниелерге ұйытқы болудағы басты мұраты - қамкөңіл жандарға көмек қолын созу арқылы олардың жігерін жану, жақсылық атаулыға баулу, үміт отын үрлеу. Осы адал ниет пен игі тілекке негізделген батыл бастамалар оны халық қалаулысы етті.

"Мен С.Шапағатов ауылында 2005 жылдан бері тұрамын. Бүгінде сүйікті кәсібімді дөңгелетіп отырмын. 2019 жылдың қыркүйек айында ауылда 75 орындық "Ана" жекеменшік балабақшасын аштым. Сол сәттен бастап көп балалы, аз қамтылған отбасыларға, жалғыз басты аналарға арнап 50 пайыздық жеңілдікпен төлем төлеу және тегін қатынау мүмкіндігін қарастырып, арнайы көлік қатынасын ұйымдастырдым. Ауылда түйіні тарқамай тұрған түйіткілді мәселелер өте көп. Ана мен балаға әлеуметтік қолдау көрсету, қашықта оқу барысында қиындық тудырған ең өзекті мәселе толыққанды ғаламтор желісімен қамту, жас буынға кәсіби бағыт-бағдар беру, ауыл аумағында қоқыс төгу тәртібін ұйымдастыру, ауылішілік жолдардың сапасын қадағалау секілді аса назар аударарлық дүниелер жетіп артылады. Менің о бастан былтыр өткен саяси додада бақ сынауымның басты себебі де осы жайттар", - деп атап өтті Балғаным Джулдибаева.

Кез келген қазақ бойында қайырымдылық сынды қанға сіңген керемет қасиет бар. Балжан Джулдибаева қай кезеңде де қайырымды іс қылудан қол үзген жоқ. Көптің алғысына кенеліп, абырой биігінен бой көрсетіп жүр. Бүгінде аудан тұрғындары сан түрлі мәселемен Балғаным ханымның жеке қабылдауына кіреді. Балғаным Джулдибаева кез келген азаматтың талап-тілегіне мұқият құлақ түріп, мәселе астарына ерекше назар аударып, оң шешімін табуына мүдделілік танытады, бар күш-жігерін салады. Соның айқын дәлелі - аз қамтылған отбасыларды ұдайы азық-түлік себеттерімен қамтамасыз етуі, Сайын ауылдық кітапханасына компьютер жабдықтары жиынтығын сыйға тартуы, спортпен шұғылданатын ауыл балаларының өзге облыстарға жарысқа қатысуы үшін жол шығынын өтеуі, облыстық отбасылық үлгідегі балалар ауылына қаржылай көмек көрсетуі секілді мерейіңді өсіріп, кісілік келбетіңді кемелдендіре түсетін дүниелер бір парасы ғана.

"Балғаным ханымға айтар алғысым зор. Жалғызбасты аналарға қолдау көрсетуден аянып қалған емес. Мен 1-топ мүгедегімін. Менің бір ауыз сөзімді жерге тастамай, арнайы массаж аппаратын алып берген еді. Денсаулығыма тигізер пайдасы аса зор", - деп ризашылығын білдірді Сайын ауылының тұрғыны Л.Мағзумова.

Қазіргі таңда Балғаным аудандық мәслихат депутаты ретінде өңірдің саяси-экономикалық ахуалын тұрақтандыру, сондай-ақ күн тәртібіндегі өзекті мәселелердің шешілуіне ықпалдастық етуден қол үзбей келеді. Бұдан өзге ауылдар мен елді мекендерде туындаған экологиялық жағдайды жақсарту, абаттандыру, жасыл желекпен көмкеру, ауыл көшелерін толықтай жарықтандыру, ауылішілік және ауыларалық жолдар мен ауыз су, жылу, газ секілді инженерлік инфрақұрылымдар қызметінің сапасын бақылау бағытындағы әр алуан іс-шараларды ұйымдастыруда белсенділік танытады. Қазіргі таңда ол төтенше жағдай туындай қалған мезетте азық-түлік қауіпсіздігін қамтамасыз ету, әлеуметтік маңызы бар азық-түлік тауарлары бағасын негізсіз көтеруге жол бермеу мақсатында ұйымдастырылған мониторинг топтың құрамында. Сондай-ақ көгілдір отын бағасын тұрақтандыру мәселесінде де азаматтық белсенділігін танытып келеді.

Жоғарыда аталған дүниелердің бәрі дерлік туған елге адал қызмет қылу мен туған ауылдың ажарын айшықтай түсуде табанды еңбек етудің, қай кезде де ізгі адамгершілік қасиеттерден айнымаудың жарқын үлгісі бола алады. "Ауылына қарап, азаматын таны" демекші, Балғаным Джулдибаева секілді жандардың арқасында ұлт руханияты мен экономикалық күш-қуатымыздың қайнар көзі ретінде ауылдардың мәртебесі өсе бермек.

Голрох ЖЕМЕНЕЙ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.