«Nauryz fest – 2021»: Ақтауда жас ақындар айтысы өтті

Бүгін «Mangystau Nauryz fest – 2021» жастар фестивалінің «Тарихқа тағзым күні» аясында облыстық жас ақындар айтысы өтті, - деп хабарлайды mangystaumedia.kz сайты.

Айтысқа өңірдің аудан, ауылдарынан келген 10 ақын қатысты.

Шара барысында Маңғыстау облыстық ішкі саясат басқармасының басшысы Аманғали Нұрдәулетов жас ақындарға сәттілік тіледі.

Ақындар сөз додасында Тәуелсіздіктің 30 жылдығын арқау етті. Олар тарихтан өткен тұлғаларды, елін, жерін қорғаған батырларды, ақындар мен би-шешендерді жырға қосты.

Дода 2 кезеңге созылды. Алдымен ақындар бір-біріне өткір сұрақтар қойып, ұтымды жауаптар қайтарды. Егемендіктің жетістігін, өзекті мәселелерді сөзбен өрнектеп жеткізді. Сөзден сүрінбеген 5 ақын қазылар алқасының шешімімен екінші айналымға өтті. Онда ақындар сахнада тұрып, Құлмамбетше айтысты.

Нәтижесінде бас жүлдені қарақиялық Азамат Орынбасаров иеленді. І орынды Жанболат Әлиев, ІІ орынды Бейнеуден келген Нұрсұлтан Оңғарбаев еншіледі. Ал ақтаулық Ердәулет Сардар III орынды қанжығасына байлады. Сондай-ақ қатысушыларға Алғыс хат табыстады.

Жұлдызай ҚАЛИЕВА

Суреттер Маңғыстау жастар ресурстық орталығынан алынды

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.