Бүгін Ақтауда «Viva Atyrau» мейрамханасында Наурыз мерекесіне орай қарттар үшін арнайы дастархан жайылды, - деп хабарлайды mangystaumedia.kz.
Кәсіпкер Тенгиз Маммедовтың бастамасымен Ақтау қалалық жұмыспен қамту орталығында тіркеуде тұрған жалғыз қалған зейнеткерлерге шағын мереке ұйымдастырылды.
Бүгінгі жайылған ақ дастарханның маңызы өте зор. Қамқорлық пен көңіл бөлу - адамгершіліктің ізгі бастамасы. Үлкен кісілердің алғысын алғанның өзі мәртебе. Кәсіпкер Тенгиз Маммедовтың ісіне береке берсін, - деді Ақтаудағы Әзербайжан консулдығының бас консулы Эльмар Маммедов.
Егде кісілерге арналып арнайы жасалған шараға ақпараттық қолдау көрсеткен "Маңғыстау-Медиа" ЖШС директоры Айсұлу Қабышқызы да ізгі тілегін арнады.
Алда келе жатқан мерейлі мерекеміз құтты болсын. Қарияларымыздың көңілін тауып, бір сәт көңіл бөліп отырған Тенгиз Маммедов пен Әзербайжан консулдығының бас консулы Эльмар Маммедовтың бұл шараға қосқан үлесі зор. Жалғыз қалған кісілерге құрмет көрсеткен азаматтар осындай болсын дер едім, - деді "Маңғыстау-Медиа" ЖШС директоры Айсұлу Қабышқызы.
Мерекелік шараға 20 шақты егде жастағы кісі қатысып, ән айтып, билеп көңіл көтерді.
«Наурыз мерекесіне орай бізге арнап дастархан жайып жатыр. Барлығы дәмді, аспаздар мен ұйымдастырушыларға көп рақмет. Кәсіпкер Тенгиз Маммедовтың көңіл бөліп құттықтап жатқанының өзі үлкен қуаныш. Бізді осылай жинап, көңілімізді тауып жатқанына ризамыз. Жұмыспен қамту орталығы да жалғызбасты қарттарды ұмытпай бұл шараға үлесін қосып жатыр», - дейді зейнеткер Зоя Тихановская.
«Көрсетіліп жатқан камқорлық пен көңілдің орны ерекше. Бізді бір дастархан басына жинап, Наурыз мерекесінде керемет көңіл-күй сыйлап жатқанына қуаныштымыз. Жалғызбасты қарттармен бірге әңгімелесіп, тілегімізді айтып отырғанның өзі бір ғанибет», - дейді зейнеткер Лидия Жұмабаева.
«Мұндай шараны бірінші рет ұйымдастырып жатқан жоқпыз. Қолымнан келгенше осы мейрамхана кәсібінің арқасында тасада қалған адамдарға көмектескім келеді», - дейді «Viva Atyrau» мейрамханасының директоры Тенгиз Маммедов.
Кәсіпкердің айтуынша, жақын арада балалар үйінде де осындай мереке ұйымдастырылмақ.
Махаббат Нұржанқызы
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
