Маңғыстаудағы газ: Баға қайда шарықтап бара жатыр?

Қара алтынның үстінде отырған Маңғыстау халқы да автогаздың проблемасынан көз ашпайды. Мәселен осыдан бір ай бұрын 60-65 теңгеден сатылған сұйытылған газ қазір 80-85 теңгеден саудаланып жатыр, - деп хабарлайды mangystaumedia.kz.

Газдан қиыншылық... Халық қой зардап шегіп жатқан. Мұның бәрі қолдан жасалып жатыр деп ойлаймын. Жақында 55 теңгеден сатылды, енді 80 теңгеден сатып жатыр. Маңғыстауда газ өндіріп тұрып, 80 теңгеге сату деген сұмдық, - дейді көлік жүргізушісі Айтқали Үсенбаев.

Бұрын көлігімізге 3500-3800 теңгеге толтыратын едік газды. Қазір 5000-5500 теңгеге шығады. Оның өзі қалтаға салмақ түсіреді. Газдың бағасы түскені жақсы ғой халыққа, - дейді көлік жүргізушісі Өміржан Бақтыбаев.

Халық қанша жан айқайын айтса да, шенеуніктер газға қатысты ешқандай проблема жоқ деп ойлайды. Маңғыстау облысының энергетика басқармасындағылар тапшылық жоқ, облыс бойынша 140 бекет жұмыс істеп тұр дейді. Маңғыстау облысына қажетті 3,5 мың тонна газды Атырау облысынан алатын болғандықтан, баға өскен болуы мүмкін дейді. Өйткені, Атыраудан алынатын газ арзанға сатылса онда нағыз тапшылық болуы мүмкін деп болжайды. Себебі, атыраулық кәсіпкерлер келісімшартты бұзуы мүмкін екен.

Алдағы уақытта бірінші қаңтардан бастап өнім 100 пайыз электронды сауда алаңдары арқылы сатылатын болады. Соған байланысты алдағы уақытта баға саясаты ұсыныс пен сұраныстың ара-қатынасынан туындап қалыптасатын болады. Тапшылық болатын болса бағаның қатты өсуіне әсер етеді, - дейді Маңғыстау облыстық энергетика және ТҮКШ басқармасының басшысы Бердібек Қартбаев.

Ал Энергетика министрлігінің ақпаратынша, Қазақстаннан жылына 1,3-1,5 миллион тонна автогаз экспортталады. Негізгі экспорттаушы «ТеңізШевройл» компаниясы, ал бұл серіктестік елдің ішкі нарығына газ өндіруден босатылған. Министрлік әзірге сұйытылған мұнай газын экспорттауға шектеу қоюды қарастырып отырған жоқ. Ал автогаз бағасы еркін айналымнан алынбауы мүмкін. Өйткені, бүкіл өнім көлемін электронды сауда алаңында сатуды көздеп отырғандықтан, баға сұраныс пен ұсыныс негізінде қалыптасады деді министрлікте.

Махаббат Нұржанқызы

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.