«Айбын-2020» байқауы басталды

Республикалық «Айбын-2020» VI республикалық әскери-патриоттық байқауы басталды. Аталмыш байқаудың ашылу салтанаты елордада өтті. Оған Маңғыстаулық оқушылар онлайн форматта қатысты.

Әскери-патриоттық жастар жиынында Қорғаныс министрі генерал-лейтенант Нұрлан Ермекбаев сөз сөйлеп, қатысушыларға сәттілік тіледі.

«Адал және табанды күресте жеңіске деген үміттеріңізді жоғалтпаңыздар, бастысы – жеңіс емес, осы жарысқа қатысып, өз мүмкіндіктеріңізді сынау», - деді ол.

Елдегі күрделі жағдайға байланысты іс-шара алғаш рет онлайн режимде өткізілуде. Республикалық жиынға әр өңірден барлығы 39 команда, соның ішінде Маңғыстау облысынан «Альтаир» және «Жас теңізшілер» атты 2 команда қатысып жатыр.

«Бүгін біздің өңірден Айбын әскери-патриоттық жиынына 30 бала қатысып отыр. Біз осы сайысқа мектептерден оқушырды өз еріктерімен іріктеп алып, дайындадық. Арасында қыз балалар да бар. Дайындықтарымыз мектепте, ашық алаңда өтті. Мақсатымыз - оқушыларды патриоттыққа тәрбиелеу. «Айбын-2020» сайысында жүлделі орын аламыз деп сенеміз», - деді «Жас сарбаз» әскери-патриоттық қозғалысының МОФ төрағасы Мақсат Жолаев.

Қазақстан Республикасының Тұңғыш Президенті – Елбасы Нұрсұлтан Әбішұлы Назарбаевтың бастамасымен 2018 жылдан бастап қолға алынған «Жас Сарбаз» республикалық әскери-патриоттық қозғалысының қызметі жыл сайын жанданып келеді. Бүгінгі таңда әскери-патриоттық клубтардың саны 2828-ден 6640-қа жеткен. Тәрбиеленушілер саны 74 164-тен 195 886-ға артқан. Маңғыстаулық оқушылар да аты аталған клубтың мүшесі атанғандарын мақтан тұтады. Мақсаттары да айқын.

«Біздің ұранымыз: «Жас теңізшілерміз, жеңіске бірге жетеміз!» Маған әскери қызмет ұнайды. Осы салада өзімді жақсы қырымнан көрсеткім келеді. Мен 11-сыныпты аяқтағаннан кейін әскери бөлімге тапсырамын деген ниеттемін», - дейді 10 сынып оқушысы Мағауия Қонысбаев.

Сайысты көрермендер онлайын көру үшін Қарулы Күштердің Ұлттық әскери-патриоттық орталығында арнайы фронт-офис құрылған. Онда Led-экран арқылы жарысқа қатысушылардың өнерін тамашалауға болады. Әр өңірдегі командалар да өз өнерлерін тікелей эфир арқылы көрсете алады. Сонымен қоса іс-шараны өткізу үшін «Aibynonline.kz» онлайн-платформасы және «Aibyn» мобильді қосымшалары мен веб-сайт әзірленген.

Биылғы сайыста әскери-қолданбалы спорт түрлерінен жарыстар өткізілмек. Қатысушылар «Айбын дарыны» интеллектуалдық ойыны, «Айбын жұлдызы», «Саламатты Жас Сарбаз», «Смарт Сарбаз» номинациялары бойынша бақ сынайды.

Әділқазылар алқасы Нұр-Сұлтан қаласында қатысушы жастардың өнерін сарапқа салатын болады. Олар онлайн көрсетілімдер арқылы жеңімпаздарды анықтайды.

Іс-шара барысында жаңалықтарды көпшілікке дер кезінде жеткізу мақсатында Қарулы Күштердің Ұлттық әскери-патриоттық орталығында «Аibyntv» студиясы ашылған. Онда «Жас сарбаз медиа» шығармашылық тобының жас тілшілері арнайы репортаждар жүргізетін болады.

Республикалық жиынның жабылу салтанаты 30 қараша ҚР Тұңғыш Президенті-Елбасы кітапханасында өтеді. Оған жеңімпаз командалардың капитандары шақырылатын болады. Ал шалғайдағы өзге қатысушылар қорытынды кешті бейнебайланыс арқылы тамашалай алады.

Айгүл ОРЫНБАЕВА

Суреттерді түсірген Талант ҚҰСАЙЫН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.