Жоғарғы соттың төрағасы Мәлік Кенжалиевке қатысты түсінік берді

ҚР Жоғарғы сотының төрағасы Жақып Асанов Ақтау қалалық сотының төрағасы Мәлік Кенжалиевке қатысты қызметтік тексеріс бойынша түсінік берді, - деп хабарлайды mangystaumedia.kz сайты ҚазАқпаратқа сілтеме жасап. «Егер компанияда қызметкер нашар жұмыс істесе, оны бірден қызметінен босатады. Ал сотта бұлай істеуге болмайды. Сотта көп сатылы рәсім іске асырылады және ол жарты жылға жалғасады. Осы қарастыру процесі жаз кезінде басталған болатын. Жазда бұл мәселеге қатысты шағым түсіп, кейіннен жазба өтініші болды. Яғни бұл рәсім дұрыс, барлық елдерде осылай іске асырылады. Атап айтқанда, Жоғарғы сот немесе облыстық сот төрағасы судьяны бірден жұмысынан босата алмайды. Бұл тұрғыда тәуелсіздік кепілі бар», - деді Ж. Асанов Сенаттың жалпы отырысында. Осы орайда ол қандай жағдайда судья қызметінен босатылатынын түсіндірді. «Біріншіден, көп сатылы рәсімдерден өту керек. Екінші жағынан, жоғары тұрған сот инстанциясы судья үкімі мен шешімінен өрескел заң бұзушылықтарды анықтаса, тиісті талқылау жүргізіледі. Осы жағдайлар сот жюриінде талқылау жүргізуге бастама бола алады», - деді Жоғарғы сот төрағасы. Сонымен қатар Жақып Асанов аталған судьяның мәселесін қарастырудың алдағы тәртібіне тоқталды. «Менің пікірім мен Сот жюриінің көзқарасы сәйкеспеуі мүмкін. Осы мәселеде 9 судья шешім қабылдады. Осыған дейін Маңғыстау облыстық сотында және судьялар одағы комиссиясында шешім жасалды. Яғни бағаны судьялар береді. Енді бұл мәселе Жоғарғы сот кеңесінің алаңында қарауға шығарылады. Қазіргі кезде оның лауазымы уақытша тоқтатылды, жұмыстан босатылған жоқ. Барлық материалды қарағаннан кейін, өзімнің пікірімді қалыптастырамын», - деді. Естеріңізге сала кетейік, бұған дейін сайтымызда Сот жюриінің тәртіптік комиссиясының шешімімен судья  әдебіне қайшы келетін теріс қылық жасағаны үшін Ақтау қалалық сотының төрағасы Мәлік Кенжалиевтің судья өкілеттілігі тоқтатылғанын мәлімдеген едік. Сол кезде Мәлік Кенжалиев өзінің қызметінен заңсыз босатылғанын айтып пресс-конференция өткізбек болған еді. Алайда Маңғыстау облыстық соты "М.Кенжалиев теңіз жағасында коттедж салған жұмыс бригадасына жарты ақшасын, яғни 1,8 млн теңге соманы 2 жыл бойы қайтармаған, бригадирге балағат сөздер айтып, оны түрмеге отырғызатынын айтып қорқытты" деп мәлімдеді. Ал әлеуметтік желіде М.Кенжалиев өзінің шын мәнінде Айгүл Ақбердіге қатысты ақтау үкімін шығарғаны үшін қудаланып жатқанын мәлімдеген еді. Бірақ Маңғыстау облыстық соты А. Ақбердінің ісі бойынша шығарылған ақтау үкіміне М.Кенжалиевтің еш қатысы жоқ деп хабарлады. Дәл осы А.Ақбердіге ақтау үкімін шығарған судья Г.Байтұрованың сөзінше, оның ақтау үкімін шығаруына М.Кенжалиев заң бойынша ешқандай ықпал ете алмайды және ықпал етпеген.