©
Қиыршық тас, құм, топырақ, қара топырақ және басқа кең таралған пайдалы қазбаларды заңсыз өндірушілер қоршаған ортаға 1,5 млрд астам теңгеге зиян келтірілген. Бас прокуратура мұндай 700-ден астам фактіні анықтаған. Бұл туралы Бас прокуратураның баспасөз қызметі өзінің ресми сайтында хабарлады.
Бас прокуратурада өткен кеңесте жер қойнауын пайдалану саласындағы заңдылықты тексерудің қорытындылары жарияланды. Оған сәйкес, Батыс Қазақстан, Жамбыл, Қызылорда, Маңғыстау және Павлодар облыстарында 17-ге жуық субъект жер пайдалану құқығын алмастан, табиғи ресурстарды заңсыз өндіргені анықталды.
Жамбыл облысында «ISS Ingineering» және «Bahon-Строй» компаниялары темір жол және автомобиль жолдарын салу үшін 197 мың текше метр жер қойнауын өз беттерінше алып қойған. Келтірілген залалдың мөлшері 626 млн теңгені құрады. Прокуратураның ұсынысы бойынша Экология департаменті сот тәртібімен зиянды өндіру шараларын қабылдаған.
Бас прокуратураның хабарлауынша, Алматы, Жамбыл және Батыс Қазақстан облыстарында 200 жағдай бойынша жер қойнауын пайдалану қызметі экологияға зиян келтіре отырып, қоршаған ортаға шығарылатын эмиссия бойынша уәкілетті органның рұқсатынсыз жүзеге асырылған.
«Астананың маңынан заңсыз 54 карьер анықталды, ол жерден шамамен 176 мың текше метр қара топырақ, 38 мың текше метр құм ұрланған. Мемлекетке 300 млн теңгеден астам зиян келтірілді. Аталған факт бойынша 11 адамға, оның ішінде ішкі істер органдарының пайдалы қазбаларды ұрлауға қолдау көрсеткен 5 қызметкеріне қатысты қылмыстық іс тергеп-тексерілді. Олардың барлығы сотталды», - делінген Бас прокуратураның хабарламасында.
Жер қойнауын пайдалану кезінде бұзылған жердің құнарлылығын қалпына келтіруге қатысты мемлекеттік бақылаудың болмау себебінен Ақмола, ШҚО, Жамбыл, БҚО, Қостанай және Қызылорда облыстарында 147 астам субъект жерді қорғау жөніндегі жұмыстарды орындаудан өз беттерінше бас тартқан. Қазба өндіру жұмыстары аяқталғаннан кейін 5 жыл бойы олар карьерлерді консервациялау және жою шараларын қабылдамаған. Анықталған барлық заң бұзушылықтар бойынша 62 адамға 6,9 млн теңге сомасындағы әкімшілік айыппұл салынып, 11 келісім-шарт бұзылып, 147 жосықсыз жер қойнауын пайдаланушыны жер қойнауын пайдалану салдарын жоюға мәжбүрлеу туралы 3 талап енгізілген.
"Қазір жер қойнауын пайдаланушылардың заңсыз иелігіндегі 82 жер телімін алу мәселесі қарастырылуда", - делінген хабарламада.
Бас прокуратураның хабарлауынша, мемлекет кірісіне экологиялық зиян, салық және басқа міндетті төлемдер, айыппұлдар ретінде 821 млн теңге өндірілген.
Сондай-ақ Бас Прокурор Премьер-Министрге жер қойнауын заңсыз өндіру әрекеттерін анықтауға, оның алдын алудың тиімділігін арттыруға және жол бермеуге қатысты ұсыну енгізді.
Сурет сайттың архивінен
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
