Шетпеде құрылысшы мамандар марапатталды

©

Құрылысшылар күніне орай Шетпедегі орталық алаңда өткен сал­танатты шарада бірқатар сала мамандары марапатталды. Жиынға Маңғыстау ауданы әкімінің орынбасары Е. Махмутов және ұжым мүшелері мен ауыл тұрғындары қатысты.

– Құрылысшылар жер бетіндегі бей­біт, жасампаз мамандықтың иесі деп білемін. Елбасымыз «Құрылыс – ел экономикасының локомотиві» деп атап көрсеткен еді. Бұл– құрылысшыларымыздың еңбегіне берілген зор баға. Сіздер аудан экономикасына да сүбелі үлес қосып келесіздер. Тұрғын үй бағдарламаларын іске асырудағы құрылысшылардың қолтаңбасын ерекше айтуға болады. Биылғы бірінші жартыжылдықтың өзінде аудандағы бірден-бір кәсіпорын «Каспийцемент» ЖШС толымды істер атқарды. Мекеменің қолдауымен темір жолда көпір салынып пайдалануға берілді. Мемлекеттік «Ақбұлақ» бағдарламасын жүзеге асы­руда құрылыс саласы мамандарының еңбегі өлшеусіз. Көптеген білім нысандары ел игілігіне берілсе, соның ішінде балабақшалар мен спорт кешендері құрылысының тәмамдалуы оқушыларымыз үшін зор қуаныш. Барша құрылыс саласының қызметкерлерін айтулы мерекемен құттықтаймын, – деді Ерболат Махмутов.

Салтанатты жиында «Каспийцемент» ЖШС бас директоры А.Усольцев сөз алып, мекеме ұжым мүшелері мен аудан халқын төл мерекемен құттықтады. Шарада сондай-ақ сала ардагерлері мен маманда­рына аудан әкімінің алғыс хаты табыстал­ды. Сондай-ақ «Каспийцемент» ЖШС-ның 10-ға жуық маманы мекеме басшысының алғыс хатына ие болды. Шара соңы кон­церттік шарамен жалғасты.

Сол күні «Каспийцемент» ЖШС жұмысшылар қалашығында аудан ардагерлеріне арналып мерекелік дастархан жайылды. Оған ауданның құрылыс саласында еңбек еткен ел ағалары қатысты. Сондай-ақ жұмысшы жастар арасында түрлі спорттық жарыстар өткізілді.

«Бүгінгі шара мен үшін ерекше болды. Барлық әріптестерімді төл мерекемен құттықтаймын. Баршаңызға еңбекте жеміс, қызметте табыс, отбасыларыңа амандық тілеймін», – дейді «Каспийцемент» ЖШС-ның ауысым шебері Марат Ерниязов.

Аллаберген ҚОНАРБАЕВ Маңғыстау ауданы

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.