Mańǵystaý Media
16+
Редакция
+7 (7292) 20 48 34
hat@mangystaumedia.kz
Жарнама бөлімі
+7 778 145 90 93
reklama@mangmedia.kz
©
Бүгін Маңғыстау облысындағы ең көне аудан Маңғыстау ауданы құрылғанына 90 жыл толу мерейтойын тойлауда. Ауданның мерейтойына арналған шаралар екі күнге жоспарланған.
Осы ауданның құрылуы мен қалыптасуына үлес қосқан бірқатар азаматтарға Маңғыстау ауданының 90 жылдық мерейтойына орай ауданның «Құрметті азаматы» атағы беріліп, мерекелік медальдар тапсырылды.
Сонымен қатар ауданның мерейтойына орай бірқатар нысандар пайдалануға беріледі. Олардың қатарында Жыңғылды ауылында, Шетпе-1 шағынауданында, Қосбұлақ ауылында ашық спорт алаңы бар. Тұщыбек ауылында, Ұштаған ауылында 4 пәтерлі муниципалды тұрғын үйдің ашылу салтанаты өтеді деп жоспарланған.
Кешкісін аудан тұрғындары мен қонақтары «Сөз бен саз» концерттік бағдарламасын тамашалап, кеш мерекелік от шашумен аяқталады.
Ертең 13 қазанда орталық паркте аға буын өкілдерінің 30 жыл бұрын «Болашақ ұрпаққа арнап қалдырған хатын» ашу рәсімі өтеді деп жоспарланған. Сонымен қатар, аламан бәйге, құнан, тай жарыстары, теңге алу сынды ұлттық ойындар өтеді.
Айта кетелік, Маңғыстау осыдан 90 жыл бұрын Бүкілресейлік Орталық Атқару Комитетінің «Қазақ ССР Автономиясын аудандастыру туралы» 1928 жылдың 3 қыркүйегіндегі №743 қаулысы бойынша Адай округінің құрамында құрылды. Ол кезде жаңа ауданның орталығы Форт-Шевченко қаласы еді.
1926 жылғы Маңғышлақ уезінде Қазақ Мемлекеттік жоспарлау комиссиясының мәліметі бойынша ауыл, село халқының саны 55525 адам болған. 1930 жылы Маңғыстау ауданының 17 ауылында 7918 қожалық, ондағы адам саны 38012 болды.
Арада 11 жыл өткенде, 1939 жылдың 16 қазанында Қазақ ССР Жоғарғы Кеңесінің Жарлығы бойынша Маңғыстау ауданы екі ауданға бөлінді. Оның бірі орталығы Форт-Шевченко қаласы болатын Шевченко ауданы болса, екіншісі орталығы Куйбышев селосы болатын Маңғыстау ауданы. Ал, 1940 жылы аудан еңбекшілерінің өтініші бойынша Гурьев облыстық Кеңесі атқару комитетінің шешімі бойынша аудан орталығы Таушық поселкесіне (Социалистік городок) көшірілді.
Ауданның қазіргі орталығы Шетпе селосына Қазақстан Үкіметінің 1964 жылы 15 мамырдағы №318 қаулысымен көшірілді. Бұл 1966 жылы салынып бітуі тиіс "Мақат — Маңғыстау" теміржолының құрылысымен байланысты еді.
90 жылдық мерейтойын тойлап жатқан Маңғыстау ауданында бүгінде 38700 адам тұрады, 7 ауылдық округ, 5 ауылға қарасты барлығы 21 елді мекен бар.
Камшат ОҢҒАЛТАЙ,
Суреттерді түсірген Талант ҚҰСАЙЫН
[gallery td_select_gallery_slide="slide" ids="63357,63356,63355"]
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.