"Шетпе" автоматты газ тарату станциясы пайдалануға берілді

Маңғыстау ауданының халқына газ қысымы жеткіліксіз болғандықтан «Окарем – Бейнеу» магистралды газ құбырынан Шетпе ауылына дейін 90 шақырым газ құбыры тартылып, автоматты газ тарату стансасы салынды. Бұл игілікті іс Индустрияландыру картасы шеңберінде Маңғыстау облысы әкімдігі, «ҚазМұнайГаз» ҰК және «ҚазТрансГазАймақ» АҚ арасындағы үш жақты меморандум аясында жүзеге асты.

Шетпе- Жетібай жолының бойында ашылған жаңа стансасының ашылуына облыс әкімі Ералы Тоғжанов, оның орынбасарлары, «ҚазТрансГазАймақ» АҚ басшылығы және аудан тұрғындары қатысты.

–Құрметті қонақтар! Сіздерді Тәуелсіздік мерекесімен құттықтаймын! Егемендіктің арқасында еліміз өсті, дамыды. Экономикалық жағдайымыз жақсарып, әлеуметтік мәселелеріміз шешілді. Тәуелсіздік алған алғашқы жылдарда еліміздің басынан қаншама қиын кезеңдер өтті?! Сол уақыттан бері мемлекетімізде ірі жобалар іске асты. Шет мемлекеттермен берік байланыс орнаттық. Әлеуметтік- саяси сұрақтарымыз шешілді. Еліміздің кейбір облыстарының орталықтарының өзінде газ жоқ. Газбен қамту жұмысы оңай болса, өңірлердің барлығына газ тартылар еді. Облысымыздың 5 ауданында және Жаңаөзен қаласында жалпы ұзындығы 1370 шақырымды құрайтын газ құбырын тарту жұмыстары жүргізіліп жатыр. Жобаны іске асыруға 800 адам жұмысқа тартылды. Қуаныштарыңыз құтты болсын! – деді облыс әкімі Ералы Тоғжанов.

Аудан халқын құттықтаған «ҚазТрансГазАймақ» АҚ Маңғыстау өндірістік филиалы директорының бірінші орынбасары Ернұр Ибраев: «Газ қысымы әрбір ауылға, әрбір үйге молынан жетеді. Жаңа станса ел игілігіне қызмет етсін! » деген тілегін жеткізді.

Жан жадыратарлық жаңалыққа жиналған қауым алдында газ тарату стансасының символикалық түймесі басылып, салтанатты түрде іске қосылды.

–Бұрын ауданға газ Жетібайдан көлемі 219 диаметрлік құбырмен келетін. Аудан орталығына, одан кейін ауылдарға тарайтын газдың қысымы төмендеп кетеді. Тіпті апаттық жағдай туғызған кездер болды. Жаңа газ құбыры көлемі 315 диаметрлік құбырмен келеді. Қажетті газ қысымын аламыз. Ауданда газ тапшылығы жойылды. Аудан халқының саны өссе де бұл жаңа станса қажеттілікті өтейді. Мәселен, Шетпе, Жыңғылды, Шайыр, Тұшыбек, Жармыш ауылдарындағы тұрғын үйлерге және түрлі кәсіпкерлік нысандарына пайдаланылады. Жаңа стансаға 8 адам жұмысқа қабылданды. Жетібайдан келетін газдың көлемі сағатына 5 мың текше метр болса, «Окарем – Бейнеу» магистралды газ құбырынан сағатына 20 мың текше метр көгілдір отын келеді, – деді «ҚазТрансГазАймақ» АҚ Маңғыстау өндірістік филиалы Маңғыстау газ шаруашылығының директоры  Игісәт Серікбаев.

Фарида МҰҢАЛҚЫЗЫ

Суретті түсірген Серік МАЙЕМЕРОВ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.