Облыс әкімі Таушық ауылына жасаған ісссапары кезінде ауыл халқын жұмыспен қамтып, өңірдегі шағын және орта бизнестің дамуына үлес қосып отырған «Таушық ауыл шаруашылығының» жұмысымен танысты.
Түйе, жылқы, қой өсірумен айналысатын кәсіпорынның негізгі тауарлары – мал өнімдері мен бау-бақша өнімдері. Халыққа тұтынуға шығарып отырған серіктестіктің сүт өнімдерін облыстағы мұнай компаниялары да тұтынуда. Серіктестік қарамағында шұбат шығаратын цех, жүн өңдеу цехы, мал сою алаңы, наубайхана, бау-бақша, балық аулау шаруашылығы, сусындар шығаратын цех бар.
Қазіргі таңда 2000 бас түйе, 200 жылқы, 1000 бас қой өсірілетін кәсіпорынның жетістігі елімізде «асыл тұқымды қазақтың қос өркешті айыр түйесін өсіретін шаруашылық» және «асыл тұқымды қазақтың адай жылқысын өсіретін шаруашылығы» болып отыр. Шағын ауылда 120 адамға жұмыс орнын құрып отырған кәсіпкерге, шаруашылықтың ұжымына Ералы Тоғжанов табыс пен еңбектеріне жеміс тіледі.
Сонымен қатар ауыл орталығында заманға сай ашық спорт алаңы Маңғыстау облысы әкімінің қолдауымен, НКОК компаниясы демеушілігімен салынып, салтанатты түрде ашылды. Осыдан 2 жыл бұрын аталмыш компания демеушілігімен спорт кешенінің ғимараты пайдалануға берілсе, құны 14,8 млн теңгенің ашық спорт алаңында ауыл жастары футбол, баскетбол, волейбол ойнап, кез келген уақытта емін еркін доп тебуге мүмкіндік алды.
Милана ЕЛЕУСІНОВА
Суреттерді түсірген Серік МАЙЕМЕРОВ
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
