Шетпеде бұқтырылған ет консервісін шығаратын цех ашылды

Тәуелсіздік тойы қарсаңында Маңғыстау ауданының орталығында «Сегізбай ата» ауыл шаруашылығы кооперативінің директоры Мұхтар Қармысов мал етін консервілеу цехын ашты. Маңғыстау облысында тұңғыш рет қолға алынған кәсіп түрі отандық өнімнің өрісін кеңейте түсті. Облыс әкімі Ералы Тоғжанов айтулы  қуанышқа ортақтасып, кәсіпкердің  тың идеясына табыс тіледі.  

–Құрметті қауым! Облыстағы төрт түліктің 50 пайызы Маңғыстау ауданына тиесілі. Шағын және орта бизнесті дамытамын деген тұрғындарды  әрқашан да қолдаймын. Бұл цех тек облыс көлемін ғана емес, елімізді сапалы отандық өнімімен қамтамасыз ететініне сенім мол. Күніне 1 000 дана консерві шығарып, болашақта 15-20 адамды жұмыспен қамтитын бұл цехтың болашағы зор болады. Алдағы уақытта басқа да өнімдер шығарып, өңір экономикасының дамуына үлес қосатын кәсіпкерлік нысаны болуына тілектеспін, –деді облыс әкімі Ералы Лұқпанұлы.

Аудан тұрғындары атынан құттықтау сөз алған аудандық ардагерлер кеңесінің төрағасы Аманқос Ертілеуов  бұқтырылған бұқтырылған ет консервісін шығаратын цехтың жұмысына сәттілік тіледі. Жаңа цехтың лентасы салтанатты түрде қиылғаннан кейін қонақтар ғимараттың ішін аралап, жұмысымен танысты.

–Мен осы кәсіпті бастауды ұйғарғанда «Атамекен» кәсіпкерлік палатасының көмегіне жүгіндім. Бұл мекемеден 10 млн.теңге несие алдым. Бастапқы 6 айда төлемейміз. Цехты іске қосуға 25 млн.теңге қаржы жұмсалды. Өзімізде бордақыланған және халықтан қабылданған төрт түліктің етін бұқтырып, арнайы қалбырларға салып, «Шетпе» атауымен жаңа өнімді шығаруды бастадық. Қазіргі таңда 10 адамды жұмыспен қамтып отырмын. Білімді, тәжірибесі бар 2 технолог маман жұмыс істейді. Шет мемлекеттерде жасалған әртүрлі қондырғылар Алматы қаласында менің цехыма арнап құрастырылды. Мемлекеттік стандартқа сай өнімім 338 грамды құрайды, бағасы 480 теңгеден болады.Сақтау мерзімі – 3 жыл. Алдағы уақытта кәсібімізді кеңейтіп, балықтарды да консервілеуді жоспарлап отырмыз, – деді «Сегізбай ата» ауыл шаруашылығы кооперативінің директоры Мұхтар Қармысов.

Фарида МҰҢАЛҚЫЗЫ

Суреттерді түсірген Серік МАЙЕМЕРОВ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.