Бүгін "Бәсекеге қабілетті бизнес - бәсекеге қабілетті экономика" тақырыбымен облыс әкімдігінде бизнес өкілдеріне арналған семинар өтті. Оған ҚР Ұлттық экономика министрлігі, «Стратегиялық бастамалар орталығы», «Экономикалық зерттеулер институты» АҚ және «Атамекен» өкілдері, қаржы және даму институттары мен орталық және жергілікті атқарушы органдар қатысты.
Жиында отандық бизнестің халықаралық рейтингтердегі бәсекеге қабілеттілігі, қолайлы бизнес ортаны қалыптастыру, инфрақұрылымға қолжетімділік, кадрлар даярлау, қаржыландыру және жаңа технологияларды ілгерілету мәселелері сөз болды.
Мұндай жиын өлкемізде ақпан айында да өткізілген. Онда Қазақстанның жаһандық қабілеттілігі жөнінде әңгіме қозғалса, бұл жолы кәсіпкерліктің қабілеттілігі талқыланды. Яғни, бизнестің шарттарын жасау, қолайлы жағдай туғызу, бизнес климатын өзгерту және олардың (шағын және орта бизнестің) дамуына қажетті барлық шараларды қолдау.
-Біз бүгінгі баяндамаларымызды үшке бөлдік: бірінші – Ұлттық экономика тарапынан жеңілдетулер, екінші – инфрақұрылым бойынша Инвестициялар және даму министрлігі сөз етеді және қаржы тарапынан Ұлттық банк өкілдері айтатын болады. 2018 жылдан бастап жаңа кедендік кодекс жұмыс істеп жатыр. Электронды тауарды шекарадан өткізген кезде оны электронды реттеу жұмыстары, тауарды автоматты түрде жүйеге енгізу қарастырылған. Сонымен қатар жаңа салық кодексі күшіне енді. Оның негізінде көптеген жеңілдетулер көзделген. Бұрын үш салық режимі болатын, қазір төртінші режим (орта кәсіптен үлкен кәсіпке көшу кезеңі) күшіне енді. Сондай-ақ табиғи монополиялар мен тарифтік саясатта да өзгерістер болып жатыр. Табиғи монополиялардың шағын және орта бизнестен сұрайтын көптеген құжаттары бар. Ол бойынша жеңілдіктер қарастырылады, - дейді Ұлттық экономика министрлігі стратегиялық жоспарлау және талдау департаменті директорының орынбасары Бауыржан Тұрлыбеков.
Кездесу барысында мемлекеттік органдардың өкілдері қабылданып жатқан шаралар жөнінде ақпарат беріп, бизнес өкілдерінің сұрақтары мен ұсыныстары тыңдалды.
-Бұған дейін Алматы және Шымкент қалаларында кездесу өтті. Көптеген сұрақтар қойылды. Кәсіпкерлер өздерін мазалаған, кедергі келтірген мәселелерін жеткізді. Оның барлығын жазып алдық. Талдау жүргізіліп, жеңілдету шараларын қарастырамыз, - деді Бауыржан Төлеуұлы.
Теңге БЕКМҰРЗАЕВА
Суретті түсірген Серік МАЙЕМЕРОВ
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
