«5/50» бағдарламасы – ел игілігіне бағытталған тың жоба

Еліміздің Батыс өңірі – қара алтынға бай аймақтардың бірі. Бұл мекенде мұнай өндіру ісі бір сәтке де бәсеңдеген емес.

Дегенмен аталған саладағы шешімін таппаған кейбір мәселелерге көз жүгіртіп көрсек. Мәселен мұнайшылардың еңбекақылары тиісті деңгейде төленбей тұрғанын айта кеткен жөн. Осы ретте «ҚазМұнайГаз» ҰК» құрамына кіретін «Маңғыстауэнергомұнай», «Мұнайтелеком», «Oil Services Company», «Oil Construction Company», «Oil Transport Corporation» ком­паниялары мұнайшылардың жалақысын реттеу мақсатында жаңа бағдарламаны қолға алды. Бұл – қазіргі таңдағы мұнай саласындағы қызметкерлердің әл-ауқатын дұрыстап, тұрмысын жақсартуға бағытталған бағдарлама. Еңбек ұжымының көпшілігі «ҚМГ» ұсынып отырған осы жобаны мақұлдап, тиімділігін тілге тиек етуде. Бағдарламаның күтілетін нәтижесіне зер салсақ:

Біріншіден, табыс әкелмейтін кәсіптің қызметкері ерікті түрде әкімшілікке жүгініп, 5 жыл үшін жалақының 50% мөлшерінде өтемақы алуына болады.

Екіншіден, жұмысшылардың әлеуметтілік деңгейін көтеру, сондай-ақ тұрғын үй жағдайларын жақсарту, несиелерді жабу немесе өзінің жеке бизнесін ашу мүмкіндігі туады.

«5/50» бағдарламасы аясында мұнай-сервис компанияларының басшылығы қызметтің бейінді емес түрлерін жеке секторға шығарып, жұмыстан босатылған персонал­ды сонда жұмысқа орналастыруда және қажетті шараларды атқаруда. Осы арқылы еліміздің мұнай өндірісіне қарқын қосылады деген сенім бар.

2017 жылы сәуірде мұнай-сервис компанияларының санын азайту мақсатында «ҚазМұнайГаз» ҰК» АҚ Басқармасының шешімімен өтемақы төлей отырып тараптардың келісімі бойынша қызметкерлермен еңбек шарттарын мерзімінен бұрын бұзу қағидалары бекітілді.

Ойымызды тарқатсақ шығынды азайту үшін алғашқы қадам – жұмысшылар қатарын азайту. Алайда олардың қолына құжатын ұстатып, сәттілік тілеу деген сөз емес – бұл.

Қасқыр да тоқ, қой да аман қалу үшін «ҚазМұнайГаз»ҰК» «5/50» деп аталатын бағдарлама ұсынған. «5/50» бағдарламасы еңбек шартын мерзімінен бұрын бұзудың орнына қызметкерлерге өтемақы төлеуді қарастырады. Бұл ретте өтемақының мөлшері 5 жылдағы айлық тарифтік мөлшерлеменің 50%-ын құрайды. Бұл орташа есеппен адам басына 8-9 млн теңге.

Жоба бойынша бас-жоқ көз жоқ. «Міне, сізге ақша, аман-жақсы болыңыз» деген ұстаным жоқ. Бұл алды­мен мұнайшылармен келісіледі. Оларға осы ұсыныс жасалады. Артынша олардың басқа жұмысқа орна­ласуына көмектеседі.

Айта кетуіміз керек, аталмыш жоба өз кезегін­де отанымызда тұңғыш рет жүзеге асып отыр. Қаламның ұшын қамтығалы жатқан тақырыпқа тіре­ген бойда ғаламтор мен әлеуметтік жел беттерін бір қайырып шыққан болатынбыз. «5/50» жобасы бойынша жұмысынан босатылған мұнайшылар бұл күнде қаннен-қаперсіз бірі пәтерлі, бірі үйлі-баранды болып жүргенін көріп көз қуанды. «ҚазМұнайГаз» ҰҚ» қазақты мұңайтпайды деген ой келеді санаңа...

Р. САҒЫНДЫҚОВ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.