Қазақстан Республикасы Президентінің 2015 жылғы 29 желтоқсандағы №153 Жарлығымен бекітілген Қазақстан Республикасы мемлекеттік қызметшілерінің Әдеп кодексі (Мемлекеттік қызметшілердің қызметтік әдеп қағидалары) мемлекеттік қызметшілердің моральдық-әдептілік нормаларына сәйкес мемлекеттік қызметшілердің моральдық әдептілік бейнесіне қойылатын жалпы қабылданған талаптарды, сондай-ақ олардың мінез-құлқының негізгі стандарттарын белгілейді. Кодексте белгіленген қызметтік әдеп стандарттары барлық мемлекеттік қызметшілер үшін міндетті болып табылады. Мемлекеттік қызметшілердің қызметтік әдебі - адал ниеттілік, адалдық әділдік, ашықтық, сыпайылық, клиентке бағдарлану қағидаттарына негізделеді. Мемлекеттік органның басшылары Әдеп кодексі талаптарының орындалуын, Кодекстің мәтінін мемлекеттік органдардың ғимараттарында баршаға көрінетіндей жерде орналастыруды қамтамасыз етуі тиіс.
Әдеп Кодексі халықтың мемлекетке сенімін арттыруға, мемлекеттік қызметшілердің қызметте өзара қарым-қатынастың жоғары мәдениетін қалыптастыруға және мемлекеттік қызметшілердің әдепсіз мінез-құлық жағдайларының алдын алуға бағытталған.
Мемлекеттік қызметшілерге қойылатын талаптардың бірі - қарапайым болу, жалпы қабылданған моральдық-әдептілік нормаларын сақтау, азаматтармен және әріптестерімен қарым-қатынаста сыпайылық пен әдептілік таныту, шындыққа сәйкес келмейтін мәліметтерді таратпау.
Қоғам мемлекеттік қызметшілер өз міндеттері мен функцияларын қолданыстағы заңнамаға сәйкес адал, құзыретті және тиімді түрде орындайды деп есептейді және мемлекеттік қызметшілер өз міндеттерін орындау кезінде азаматтармен қарым-қатынаста ұстамды болып, өзінің лауазымдық жағдайын баса көрсетпей, саналы түрде құрметпен қарауы тиіс.
Шындыққа сәйкес келмейтін мәліметтерді таратуға тыйым салу азаматтарға, басқа да мемлекеттік қызметшілер мен ұйымдарға бағытталған тұлғааралық қарым-қатынас немесе көпшілік алдында сөз сөйлеу кезінде электрондық және баспа бұқаралық ақпарат құралдарында жалған, дәл емес немесе бұрмаланған ақпаратты жариялауға жол бермеуді білдіреді.
Маңғыстау облысы бойынша қазынашылық департаменті қызметкерлерімен заңнамалар бұзушылықтарына жол бермеу мақсатында Қазақстан Республикасының мемлекеттік қызмет, сыбайлас жемқорлыққа қарсы іс-қимыл саласындағы заңнамасын және Әдеп кодексін сақтау мәселелері бойынша департаментте түсіндіру жұмыстары тұрақты түрде жүргізіледі.
Маңғыстау облысы бойынша
қазынашылық департаменті
басшысының орынбасары
Ж.Бердиева
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
