Маңғыстауда өзге өңірлердің оқушыларына экспедиция ұйымдастырылды

«Туған елге тағзым» экспедициясы аясында Павлодар, Қызылорда, Орал қаласының оқушылары маңғаз Маңғыстаудың әсем табиғаты мен тарихын зерттеді, деп хабарлайды mangystaumedia.kz Ақтаудағы Назарбаев Зияткерлік мектебінің баспасөз қызметіне сілтеме жасап.

Зерттеу бағытындағы өлкетанулық экспедициясына 74 оқушы қатысты.

Жоба аясында экспедициялық топ Маңғыстау өлкесіне тән флора мен фауна ерекшелігімен, тарихы және тұрмыс мәдениетімен, инновациялық объектілері және архитектуралық құрылыстарымен жіті танысып, зерттеді.

Жобаның алғашқы күндерінде Орал және Қызылорда, Павлодар қаласындағы Зияткерлік мектеп оқушылары Қабиболла Сыдиықов атындағы Маңғыстау облыстық кітапхананы аралады. Олар кітапхана құрылысымен, ондағы өлкетану бөліміндегі кітаптар жайында ақпарат алды. Өлкенің қалыптасуы мен дамуындағы өлшеусіз еңбек еткен, заңғар жазушы Әбіш Кекілбаев атындағы Маңғыстау облыстық тарихи-өлкетану мұражайында тамашалады.

Зияткерлер бір аптаға созылған іс-шара барысында Маңғыстау өлкесінің өндірістік әлеуетімен ете танысу, ақпарат алу үшін Ақтаудағы өнеркәсіп орындарына барды. Олар Ақтаудағы «KazFruit» азық-түлік сақтау базасына, «Ақтау түйеқұс» фабрикасы, «Kazakh Osseter» компаниясына саяхаттады. Сонымен қатар, жас зерттеушілер Қазақстандағы кешенді өнеркәсіп орындарының бірі, аммиак және аммиак селитрасын өндіретін жалғыз кәсіпорын «ҚазАзотқа», және жол битумын өндіруге бағытталған «Caspi bitum» мұнай өңдеу зауытының жұмысымен танысты. Сондай-ақ, өңірдегі ең үздік оқу ордасы Шахмардан Есенов атындағы университетінің әскери-теңіз академиясымен танысып,соңғы технологиямен жабдықталған оқу орнына қызығушылық танытты.

Жоба бағдарламасына сәйкес, оқушылар Маңғыстаудағы ХІІ-ХVІІ ғасырларға жататын діни сәулет ескерткіші саналатын Қараман ата жер асты мешітіне барды. Жас зерттеушілер діни зиярат орынына аялдап, ата-баба рухына тағзым етті.

Маңғыстауда құпиясы әлі ашылмаған жерлер өте көп, соның бірі «Торыш» шатқалы. Оқушылар тарихы миллион жылдан асатын шатқалды өз көздерімен көріп, таңдасты. Сапар соңында табиғаттың ерекше үлгісі болған «Ақеспе» алқабын да тамашалады.

Назарбаев Зияткерлік мектептерінің ұйымдастыруымен 2012 жылдан бері жүзеге асып келе жатқан дәстүрлі «Туған елге тағзым» экспедициясы биыл Ақтау, Семей, Қарағанды, Түркістан, Көкшетау, Өскемен және Павлодар қалаларында жүзеге асты.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.