Жергілікті бюджет түсімі талқыланды

Кеше облыс әкімдігінде аймақ басшысы Ералы Тоғжановтың төрағалығымен өткен жиында жергілікті бюджетке салық түсімі талқыланды. Жиынға аймақ басшысының орынбасарлары, облыстық мәслихат хатшысы Серікбай Трұмов, облыс әкімінің аппарат басшысы Асқар Рзаханов, қала әкімі Ғалымжан Ниязов және басқарма мен мекемелердің, өндірістік кәсіпорындардың басшылары қатысты.

Баяндама жасаған Маңғыстау облы­сы бойынша мемлекеттік кірістер департаментінің басшысы Данияр Жаналинов жергілікті бюджеттің кірісінің 7 айдағы қорытындысынан хабардар етіп, жос­парларды жеткізді.

– Жыл басынан бері бюджеттің түсімі бойынша жоспар 92,5%-ға орындалды. Өткен жылдың алғашқы 7 айымен салыстырғанда 5,9 млрд. теңгеге артық түсім түсті. Өсім қарқыны – 108,7%. Өсім қарқыны барлық аудандарда байқалады. Жергілікті бюджет­ке түсетін салықтардың ішінде құрылыс саласының өсімі төмен. Сондай-ақ өткен жыл­мен салыстырғанда салық көлемі денсаулық сақтау, әлеуметтік қызметтер саласында 4,3 млрд. теңгеге төмен түсіп отыр. Атап айтсақ, оның ішінде облыстық перинаталдық орталық, Жаңаөзен қалалық перзентхана үйі және қалалық емханасы бар. Басқа са­лаларды қарасақ, мәселен «Oil Construction company» компаниясы жұмысшылардың са­нын қысқартқандықтан, төлейтін салығы да азайып отыр. Әлеуметтік салық бойынша тау- кен өнеркәсібінде, құрылыс және денсаулық сақтау, әлеуметтік қызметтер саласында түсім төмендеді. Мүлік салығының көрсеткіші тау- кен өндіру, көтерме және бөлшек сауда, көлік және қоймалау, мемлекеттік басқару салала­рында төмен түскен. Бұл салық түрі бойынша барлық аудандар жоспарды орындамай отыр, – деді ол.

Данияр Еренғалиұлының айтуынша, жос­пар бойынша қоршаған ортаға эмиссия үшін төленетін төлемақы 7 айда 1 млрд. 267 млн. теңге деп белгіленсе, қазына қаржысына 1 млрд. 84 млн. теңге түскен. Маңғыстау облы­сына 2017 жылдың қорытындысы бойынша жергілікті бюджетке түскен барлық төлемнің 25%-ын ғана мұнай және газ секторы құрайды. Түсім 1 млрд. 192 млн. теңге болса, оның 305 млн. теңгесі аталған салаға тиесілі. Биылғы алғашқы 7 айда қазына қаржысына аударылған 56,6 млн.теңгенің 9,2%-ы мұнай мен газ саласы­нан түскен. Данияр Жаналиновтың хабарлауын­ша, «Маңғыстаумұнайгаз» АҚ-да мұнай өндіру көлемі артқанымен, салық түсімі төмендеген. Аталған компания өкілінің айтуынша, өткен жылы 127 млн. 123 мың, биылғы жылдың 1 тоқсанында 18 млн. теңге салық төленген.

Жиында облыс әкімі Ералы Тоғжанов «Маңғыстаумұнайгаз» АҚ-ның жиынға қатысқан өкілдеріне компанияның қоршаған ортаға эмиссия үшін төленетін төлемақыны төлеуді тапсырып, сынға алды. Сонымен қатар салық төлеуден жалтарып жүргендерді телеарнаға шығарып, жариялауды жүктеді.

– Жергілікті бюджетке 1,5 млрд. теңге бе­решек бар. Оның ішінде ең ірі көлемдегі бе­решек Ақтау қаласы мен Бейнеу ауданында. Берешек салықтардың ішінде басым бөлігін көлік құралдарының салығы құрайды. Қарыз көлемі – 524 млн. теңге. Жеке тұлғалардан салықты өндіру үшін басқа облыстардағыдай банкомат карточкасын жаптыру сынды шара­ларды қолдануды ұсынамын. Бұл жұмысты сот орындаушыларымен бірге атқаруымыз қажет, – деді өңірдегі мемлекеттік кірістер департаментінің басшысы Данияр Жаналинов.

Жиында көліктердің, тұрғын үйлердің заңды түрде тіркелмеу немесе құнынан төмен бағалануы сынды мәселесі де көтеріліп, облыс әкімі Ералы Лұқпанұлы жауапты басшыларға тапсырма берді. Облыстағы мемлекеттік кіріс­тер департаментінің басшысы Данияр Жана­линов жыл соңындағы қорытынды бойынша жоспардың 97%-ға орындалатынын хабарла­ды.

Жиында сөз алған Маңғыстау облысы бойынша экология департаментінің басшысы Руслан Төкенов 2018 жылға арналған іс-шара­лар жоспары бекітілгенін, 26 уәкілетті органға тапсырма берілгенін айтып, бұл күнде тапсыр­малар орындалмай отырғанын жеткізді. Тек Ақтау қаласында комиссия құрылғанын, басқа аудандар мен қалада, бсқармаларда бұл бағытта жұмыс жүргізілмей отырғандығын алға тарт­ты. Жыл басында тапсырылған қаладағы 56 ірі салық төлеушінің мүліктерін қайта бағалау жұмыстары 17-сіне ғана жүргізілгенін жеткізді.

Жиын соңында облыс әкімі Ералы Тоғжанов онлайн байланысқа шыққан аудан әкімдеріне және жауапты басшыларға бірқатар тапсырма­лар берді.

Фарида МҰҢАЛҚЫЗЫ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.