Ақтауда ең көп қойылатын есім - Әлихан мен Айзере

Жақында ғана баспасөз өкілдері 2017 жылы Астана қаласында ең жиі қойылған есімдердің статистикасын жарыса жазған еді. Ондағы мәліметке сүйенсек, елордалық 405 қыз балаға – Айзере, 328 ұлға – Әлихан есімдері қойылыпты.

Былтыр ең көп қойылған есімдер жөнінен Ақтау қаласы Астана қаласының көрсеткішін қайталады. Басым бөлігі Әлихан мен Айзере атанған астаналық сәбилердің ізін ақтаулықтар жалғаған. 2017 жылы қаламызда 350 – Әлихан туылса, 300 – Айзере өмірге келген.

«Ақтау қаласында 2016 жылы 6527 сәби өмірге келсе, былтыр 7601 бала дүние есігін ашты. Алдыңғы жылға қарағанда көрсеткіш жоғарылаған. Оның ішінде қыз балаларға Айзере, Айару, Аяулым, Айлин, Әмина, Айша және Аиша, Адина, Медина, Аяна есімдері жиі қойылса, ұлдарда Әлихан, Айсұлтан, Мансұр, Саян, Дінмұхаммед, Әбілмансұр, Диас есімдері жиі кездеседі», - дейді Ақтау қалалық АХАТ бөлімінің бас маманы Гүлнұр Күбірбайқызы.

Балаларға елде болып жатқан оқиғаларға байланысты есім қою дәстүрі де өзгермеген. Халықаралық ЭКСПО көрмесі кезінде бас қалада ұл балаға қойылған Бәйдібэкспо есімі тіркелген болатын. Әр ата-ана сәбиіне ерекше, мән-мағынасы мол есімдер таңдауға тырасады. Біздің өңірде де дүниеге келген нәрестелер арасында ерекше есім иелері бар дейді бас маман.

«Осы жылдың басынан бері өмірге келген сәбилердің ішінде Жансен, Дарсен, Ляйсан атты ерекше есімдер кездесті. Сондай-ақ қаңтар айының соңында дүниеге келген егіз қызға ата-анасы Махаббат және Любовь есімдерін таңдады», - дейді ол.

 Теңге БЕКМҰРЗАЕВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.