©
17 қаңтар күні Өмірзақ ауылының әкімі Ербол Сарыев Рауан, Приморский, Прозерный тұрғындары алдында есеп берді, - деп хабарлайды 7292info.kz сайты Ақтау қаласы әкімінің сайтына сілтеме жасап.
Есеп беру кездесуіне Ақтау қаласының әкімі Ғ.Ниязов, қалалық мәслихат хатшысы М.Молдағұлов, депутаттар, қала әкімінің орынбасарлары, мемлекеттік және коммуналдық мекеме басшылары, жастар және ауыл тұрғындары қатысты.
Өмірзақ ауылы мен оған қарасты елді мекендерде 6 036 адам тұрады, оның 1 749-ы - Өмірзақ ауылында, 1 324 адам Приозерный, 981 адам Приморский, 1982 адам Рауан тұрғын үй массивінде мекен етеді. Ауыл тұрғындарының 111-і мүгедек ретінде көмек алса, 23 адам жұмыссыз, 81 адам жеке кәсіпкер ретінде тіркелген. Ауылда 18 шаруа қожалығы (9 мал шаруашылығы, 9 егін шаруашылығы) кәсібін дөңгелентіп отыр.
2017 жыл жергілікті бюджеттен ауылға 111,286 мың теңге көлемінде қаржы бөлінген. Мәселен, Приозерный-1 тұрғын үй массивінің кәріз құбырларын тазартуға 12 млн теңге, Приозерный-2 тұрғын үй массивінің кәріз құбырларын ағымдағы жөндеуге 15 млн теңге, Өмірзақ ауылының кәріз құбырларын тазартуға 4,4 мың теңге, ТЭЦ-2 жылыту станциясы мен Өмірзақ ауылына дейін тартылған ауыз су құбырларын ағымдағы жөндеуге 20 млн теңге жұмсалған.
"Өмірзақ ауылындағы №27 орта мектепте 677 бала оқиды. Оның ішінде 423-ге жуық бала Рауан тұрғын үй массивінен қатынап оқиды. Өмірзақ ауылына қарасты Приозерный, Приморский, Рауан тұрғын үй массивтерінің 400-ден астам оқушысы Ақтау қаласындағы №2, 3, 6, 8, 22, 23, 28 орта мектептерге қатынап оқиды", - деп атап көрсетілген Шахар әкімдігінің сайтында жарияланған ауыл әкімі Ербол Сарыевтің есебінде.
Оқушыларды мектептерге тасымалдау үшін облыс әкімдігі жанындағы іс басқармасынан 7 автобус бөлінген.
Әкімнің баяндамасынан кейін ауыл тұрғындары өз сауалдарын қойды.
Сурет Ақтау әкімдігінің сайтынан алынды
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
