Көрікті үй – қала ажарын ашады

Қалалық әкімдікке болған баспасөз мәслихатында «Өзіңнен баста» қалалық  байқауының өткізілуі тәртібі, мақсат, міндеті жайында сөз болды. Бұл жайында Ақтау қалалық мәслихаты хатшысы, байқауды өткізу жөніндегі комиссия төрағасы Марат Молдағұлов, Ақтау қалалық тұрғын үй инспекциясы басшысы Руслан Жүкенов әңгімеледі.

Тұрған мекен–жайымыздың айналасы жасыл желекке бөленіп, тазалығымен, жинақылығымен ерекшеленіп тұрса қандай жақсы! Интернетте бұл жайында әңгіме болса, өзге қалалардың ішінде Ақтауымыздың алдымен айтылып жүргені көңіл қуантады. Шынында да көше, аулаларымыздың, пәтер айналасының таза болуы әркімнің жауапкершілігіне байланысты. Бұл ретте, тұрғын үй алдына гүлдер егіп, әсем талдар отырғызып, құлпыртып қойған, өзі тұратын үйге ғана емес, шағын ауданның жай-күйіне алаңдайтын, теректерге уақтылы су құйылмай қалса тиісті мекемелер басшыларына хабарлап, тыныш жата алмайтын тұрғындарымызды мақтан етуіміз керек. Олардың есімдерін көпшілік білуге тиіс.

-Өткізгелі отырған байқаудың мақсаты -қаланың сәулеттік келбетін жақсарту, шағын аудандар мен үйлердің энергия үнемдеуі, санитарлық жағдайы, абаттандырылуы мен көгалдандырылуын бақылау, сондай-ақ,  пәтер иелері кооперативтерінің ортақ мүліктерін сақтау және күтіп ұстау бойынша бастамаларын қолдау және дамыту,-дейді «Өзіңнен баста» қалалық байқауын  өткізу жөніндегі комиссия төрағасы Марат Николайұлы.

Тұрғын үй-коммуналдық шаруашылығын жетілдіру, ортақ мүлікті күтіп ұстау және аумақты абаттандыру мәселелері бойынша тұрғын үйді пайдалану ұйымдары мен коммуналдық мекемелердің, қала тұрғындарының, бизнес өкілдрінің және де барлық мүдделі тараптардың іс тәжірибесі мен ұсыныстарын саралау, ортақ мүлікті сақтау мен қорғауды, көгалдандыру, абаттандыру және электр энергиясын үнемдеу бойынша бастамаларды насихаттау, тұрғын үй жайлылығы мен қауіпсіздігін қамтамасыз ету бойынша технологияларды енгізу, тәуір  жабдықталған кіреберіс,  жайлы үй, ең жақсы абаттандырылған және көгалдандырылған  аумақты, сонымен қатар үздік пәтер иелері кооперативін немесе басқарушы компанияларды анықтау байқаудың міндеті болмақ.

Байқаудың жұмысшы органы ретінде Ақтау қалалық тұрғын үй коммуналдық шаруашылық бөлімі белгіленіп отыр. Комиссия құрамына «Нұр Отан» партиясы  Ақтау қалалық филиалы төрағасының бірінші орынбасары, қалалық мәслихат депутаттары, қоғамдық кеңес мүшелері, қала әкімдігі, коммуналдық мекемелер, қалалық тұтынушылар құқығын қорғау басқармасы, үкіметтік емес ұйымдар және БАҚ өкілдері кіреді.

Байқау «Үздік кірберіс», «Үздік үй» номинациялары бойынша өтеді. «Үздік кіреберіс» номинациясы бойынша кіреберістің алды және іші, «Үздік үй» номинациясы бойынша көппәтерлі тұрғын үйге қатысты барлық ортақ мүлік, үйдің  инженерлік желілер мен тиісті және қосалқы жер учаскелері толығымен қамтылуы тиіс. Байқауға пәтер иелері кооперативтері , басқарушы компанияниялар  немесе тұрғындар атынан ынталы топ қатыса алады. Ынта білдірушілер  өтініш пен қажетті ақпаратты байқау комиссиясына тапсыруы керек.

-Ай сайын коммуналдық қызмет ақысын төлеумен шектелуге болмайды. Әркім өзі тұратын пәтер алаңы, үйдің, кондоминиум нысанына қатысты жалпы мүліктің тазалығына, ұқыпты сақталуына, бүлінбеуіне жауапты болса, шығынның үнемделуіне мүдделілік танытса, осы арқылы балаларына өнеге көрсетсе дейміз. Конденционердің босқа тамып жатқан суын гүлге, өсімдікке құйып , көгалдандыруға әрі үнемдеуге үлес қосып жүргендер де бар. Жасыл энергияны пайдаланушыларымызды неге үлгі етпеске! Осындай оңды істерді көрсетуді, насихаттауды мақсат етіп отырмыз, -дейді Ақтау қалалық тұрғын үй инспекциясы басшысы Руслан Әшірбекұлы.

Құжаттарды қабылдау 21 тамыздан 15 –қыркүйекке дейін жүреді. Байқау құжаттары Ақтау қалалық тұрғын үй – коммуналдық шаруашылығы бөлімі, 403 кабинетте қабылданады. Байқау қорытындысы 22 қыркүйек» Қала күні» мерекесі қарсаңында шығарылады.

Байқауға қысқа мерзімнің белгіленіп отырғандығының өзіндік себебі де бар. Жарты жыл, бірнеше ай мерзімге созылса  ақшалы, мүмкіндігі мол қатысушылар жолдан қосылып, үйдің айналасын жарқыратып қоюы да мүмкін. Ал мұндай жағдайда бірнеше жылдан бері, тұрақты жұмыс жасап, пәтер алдын, үй маңы алаңын жайнатып қойған қарапайым жандардың еңбегі еленбей қалады. «Өзіңнен баста» қалалық байқауын өткізу жөніндегі комиссия төрағасы Марат Молдағұлов « осындай келеңсіздіктер, әділетсіздіктер  болмас үшін қысқа мерзім белгіленді» деп түсіндірді.

Бақ сынап көрейік, ендеше!

                                                                       Болат ҮМБЕТОВ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.