Енді санаулы күндерден соң қоңыр күздің алғашқы аптасы да басталып, қала мен қалаға қарасты Теңге, Қызылсай, Рахат ауылдарында білім ұялары мектеп оқушыларына есіктерін айқара ашатын болады. Міне, осынау жауапты сәтке қаланың білім саласы қандай дайындықтармен келіп отыр. Бұл туралы газет тілшісімен әңгіме барысында қалалық білім бөлімі басшысы орынбасарының міндетін атқарушы Айжан Елешева жан-жақты хабардар етті. Оның айтуынша, бөлім тарапынан қаладағы білім мекемелерінің жаңа оқу жылына дайындығының барысына қатысты жүргізілген мониторинг қорытындысы, биыл өңірдегі барлығы 48 балабақша, 2 мектептен тыс мекеме, 23 мектептің 27 мыңнан астам оқушыны қабылдауға сақадай-сай әзір тұрғандығын көрсетеді. Ағымдағы жылы мектеп жасындағы балалардың 3600-і бірінші сыныптың табалдырығын аттамақшы. Әлеуметтік әлеуеті әрқилы деңгейдегі отбасыларынан шыққан балалардың мектепке бірдей дайындықпен келуін қамтамасыз ету үшін тамыз айының басынан бастап, облыс қалалары мен ауылдық елді мекендерінде республикалық «Мектепке жол» акциясы аясында аз қамтылған және көп балалы отбасыларына жергілікті бюджет және демеушілер есебінен қолдау көрсетіліп келеді. Ағымдағы жылда жоспар бойынша 60-қа жуық мекемелерге хат жолдай отырып, 2000-ға жуық оқушыға көмек көрсету жоспарлануда. Акция басталғалы қаладағы 26 мекеме 402 балаға көмек көрсетуге ниет білдіріп отыр. Осы күнге дейін 450 оқушыға әлеуметтік көмек берілді. 20 тамыз күні «Жаңаөзен» ойын-сауық орталығында және «Тәуелсіздік» алаңында «Мейірім» тобының жетекшісі Қайрат Есдәулетовтың ұйымдастыруымен жәрмеңке өткізіліп, түскен қаржыға балаларға киім-кешек пен оқу құралдары алынып берілді. Қалалық білім саласына қатысты білім мекемелерінің ғимараттарын жаңарту және ағымдағы жөндеу жұмыстарынан өткізу, олардың материалдық-техникалық базасын нығайту сияқты кешенді мәселелердің шешімін табу ісі ұдайы басты назарға алынуда.
Тағы оқыңыздар: Ақтауда баласы ДЦП-ға шалдыққан аналарға массаж жасау үйретілді- 12 жылдық білім беру жүйесіне кезең кезеңмен өтіп жатырмыз. Елбасының білім саласы мекемелерінің алдына қойып отырған басты міндеттердің бірі - оқушыларды оқулықтармен қамтамасыз ету мәселесі. Қазірдің өзінде 5-7 сынып оқушыларынан басқа балаларға мектеп оқулықтары таратылып жатыр. Ал, 5-7 сыныптар жаңартылған оқу бағдарламасымен оқытылатын болады, - дейді Айжан Есекенқызы. Жас ұрпақтың білім ұяларынан сапалы білім, саналы тәрбие алып шығуына мектептердегі мұғалімдер санының жеткілікті болуы әрі олардың біліктілік деңгейінің заманауи талаптарға сай келуі де айтарлықтай ықпал ететіндігі белгілі. «Сондықтан, биыл мектеп мұғалімдері курстан өтіп, білімін жетілдіру, жаңа технолгияны меңгеру мақсатында арнайы бағдараламалр аясында курс оқыды. Сондай-ақ, барлық мектеп ордалары жаңа оқу жылына орай жас мамандармен жолдама арқылы жұмысқа орналастырылады. Жаңа оқу жылында жаңа жетістіктерге қол жеткізіп, жаңалық-жақсылықтарымыз көп болсын.
Гүлсім ОСПАН
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
