Сотталғандар еңбекке араласып жүр ме?

©

Маңғыстау облысының прокуратурасы «Колонияларда жұмыспен қамтылу – 2017» жобасын орындау мақсатында бірқатар жұмыстар атқарды. Осы жылдың I жартыжылдығының қорытындысының нәтижесінде облыс аумағында орналасқан түзеу мекемелердегі жазасын өтеушілердің 79%-ы жұмыспен қамтылды.

Бұл жобаны жүзеге асыру шеңберінде облыс бойынша қылмыстық-атқару жүйесі департаментімен бірігіп, облыстық консультативтік-кеңесші органының және облыстық кәсіпкерлер палатасының мүмкіндіктерін пайдаланып, облыс аумағында орналасқан қауіпсіздігі барынша жоғары ГМ-172/6 мекемесінің аумағынан өндірістік цехтар ашуға жергілікті кәсіпкерлерді тартып, жазасын өтеушілерді жұмысқа қабылдау жөнінде түсіндірме жұмыстары жүргізілді.

Осы жылдың бірінші жартыжылдығында облыс бойынша қылмыстық-атқару жүйесі департаментіне бағынышты ГМ-172/6 мекемесінің ішінен өндірістік цех ашуға «Адилжан» және «Есмурзаев» жеке кәсіпкерлер ниет білдіріп, нәтижесінде үшжақты меморандум жасақталды. Сонымен қатар 2 сотталған адам өз кәсібін ашып, жұмыстарын бастап кетті.

Өткен жылы осы жобаға байланысты облыстық прокуратура ғимаратында форум өтті. Форумның отырысына облыс аумағындағы барлық мемлекеттік органдар, жергілікті атқарушы органдар, қоғамдық емес ұйымдардың басшылары және бизнес қауымдастықтар қатысты. Қатысушылар прокуратураның ғимаратында ұйымдастырылған көрмеде колонияларда өндірілген тұрмыстық бұйымдармен жақынырақ танысты.

Маңғыстау облыстық әкімдігінің консультативтік- кеңесші органының отырысында сотталғандарды жұмысқа орналастыру және түзеу мекемелерінде өндірілген дайын тауарларды сату жолдары талқыланды. Сонымен қатар өткен жылы облыстық прокуратурада Ақтау қаласы және Мұнайлы ауданы әкімдерінің орынбасарларын, облыстық кәсіпкерлер палатасының басшылығын және кәсіпкерлер қауымдастығының өкілдерінің қатысуымен дөңгелек үстел өтті. Осы кездесуде «Еңбек-Ақтау» РМК-ның Ақтау қалалық филиалы және «Авангард Групп Констракшн» ЖШС-де еңбек етіп жүрген сотталғандардың өндіріс аумағында өндіріп жатқан тауарлары слайд арқылы көрсетіліп, қала және аудан қажеттіліктері үшін мемлекеттік тапсырыстарды орындау мүмкіндіктері көрсетілді.

Аталған отырыста түзеу мекемелерінде өндірілген дайын өнімдерді өткізу мәселелері талқыланып, оны шешу жолдары қарастырылды.

Сотталғандарды жұмыспен қамту өзекті мәселе болғандықтан бұл бағыттағы жұмыстар жарияланып отырды. Яғни, қызығушылық танытатын кәсіпкерлерге өндірістік цехтар салу үшін жер телімдері тегін берілетіні, шығарылған өнімдер мен цехтарды күзетуге күзетші алып шығынданбайтыны, ең бастысы қолақылары арзан жұмысшыларды жұмысқа қабылдап, мол табысқа қол жеткізетіні жиі айтылады.

Онымен қоса жергілікті атқарушы органдарға колонияларда өндірілген дайын өнімдерді тапсырыс арқылы сатып алу жөнінде хаттар жолданды. Нәтижесінде Ақтау қаласы және Мұнайлы аудандық әкімдіктері «Еңбек-Ақтау» филиалы өндірген 100-ден астам қоқыс жәшіктерін,«Б.А.А.» жеке кәсіпкері өндірген 5000 шаршы метр брусчатка тастарын сатып алды. Атқарылған жұмыстардың нәтижесінде осы жылдың жартыжылдығында облыс аумағында орналасқан түзеу мекемелерінде еңбекке қабілетті 408 сотталушының 321-і немесе 79%-ы жұмыспен қамтылып отыр.

Сотталғандарды еңбекке баулып, оларға бостандықта жұмысқа орналасу үшін қоғамда сұранысқа ие жаңа мамандықтарға оқыту шаралары да жүзеге асырылуда. Ағымдағы жылдың оқу маусымы 1 қыркүйектен бастап ГМ-172/6 мекемесінің қабырғасында орналасқан кәсіпқой техникалық колледжде наубайшы, тігінші, электрші, жөндеуші мамандықтарына оқыту көзделіп отыр.

Атқарылған жұмыстар болашақта жазасын өтеуші тұлғалар бостандыққа маман болып шығып, жұмысқа орналасып, қайтадан қылмысқа барудан аулақ жүріп, қоғамға сіңісіп кетуіне өз септігін тигізеді деген сенімдеміз.

Маңғыстау облысы прокуратурасының баспасөз қызметі

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.