Маңғыстау облысында карантин талаптары күшейтілгелі жаңа қаулыға келіспейтіндердің қатары көбейіп келеді. "Пандемия басталғаннан бері айтарлықтай шығынға ұшырадық" деген Ақтаудағы мейрамхана иелері бас санитар дәрігердің белгілеген уақытына сай жұмыс істеу мүлде тиімсіз екенін айтып отыр, - деп хабарлайды mangystaumedia.kz.
Шығыннан шыға алмай отырғанда жұмыс уақытының қысқартылуы жығылғанға жұдырық болды, дейді олар. Қаладағы 150-дан астам мейрамхана қожайындары кеше ғана күшіне енген қаулының өзгертілуін сұрайды.
Облыстық бас санитар дәрігердің қаулысы бойынша тамақтану орындарына 21.00-ге дейін жұмыс істеуге рұқсат. Ал осыған келіспеген кәсіпкерлер мәселенің бәрі уақыттың қысқарғанында екенін айтып отыр. Карантинге қатысты бірінші қаулы шыққаннан-ақ көргеніміз шығын болды деген олар жұмысшыларды 80 пайызға дейін қысқартқанын айтты. Кәсіпкерлер жаңа қаулының ережесін орындау үшін қызметкерлерінің тағы 50 пайызын жұмыстан шығаруға мәжбүр. Ол өз алдына, жұмыс уақыты қысқарды екен деп жалға алып отырған ғимарат иесі жалдау ақысын азайтпайды, дейді кәсіпкер Шамрад Телеубаев.
Бүкіл мейрамхана иелерінің атынан біздің жұмыс уақытымызды қайта қарауды сұраймын. Қонақтар мейрамханаға кешкі уақытта ғана келе бастайды. Ал 21.00-ге дейін жұмыс істегенде біз бүкіл шығынымызды өтей алмаймыз. Қатаң карантин кезінде несиемізді төлей алмай кейінге шегердік, енді оны төлеу мойнымызда тұр. Бұндай талаппен жұмыс істеу мүлде тиімсіз, - дейді кәсіпкер Шамрад Телеубаев.
Кәсіпкерлер облыс әкімі мен аймақтың бас санитар дәрігеріне, кәсіпкерлер палатасына бұл мәселені шешудің жолын сұрап хат жазған. Ал облыстың бас санитар дәрігері мәселе жедел штаб отырысында шешілетінін хабарлады.
Кәсіпкерлер барлық санитарлық норма мен арақашықтықты сақтап жұмыс істеуге дайынбыз дейді. Сондай-ақ, 50 адамға дейінгі сыйымдылықпен және 23.00-ге дейін жұмыс істеуге рұқсат сұрайды. Айтуларынша, жұмыс уақыты қысқарғандықтан 5 мыңға жуық қызметкер жұмыссыз қалудың алдында тұр.
Айта кетейік, кеше облыста карантин талаптары күшейтіліп, сонымен қатар спорт нысандары, фитнес орталықтары мен жаттығу залдарының жұмысы тоқтатылған. Спортшылар мен спорт сүйер қауым да осы шешімге наразылық білдірген болатын.
Оқи отырыңыз: Спортшылар: Карантин ережесі өзгертілсін!
МАХАББАТ НҰРЖАНҚЫЗЫ
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
