Білім және ғылым министрі оқу жылының аяқталуымен құттықтады

Бүгін, 25 мамыр күні Білім және ғылым министрі Асхат Аймағамбетов оқушыларды, түлектерді, мұғалімдерді және ата-аналарды оқу жылының аяқталуымен құттықтады, - деп хабарлайды mangystaumedia.kz сайты.

«Биыл 25 мамыр күні барлығымыз үшін ерекше жағдайда өтіп жатыр. Әлемдік пандемия біздің күнделікті өмірімізді түбегейлі өзгертті. Осы оқу жылы 4 млн-нан аса оқушы мен студентке қашықтан оқыту форматында білім алумен есте қалады деп ойлаймын. Қысқа уақыттың ішінде бәріңіз жұмысты жүйелі ұйымдастыра білдіңіздер. Бұл – ұстаз, ата-ана мен оқушының бірлескен әрекетінің жемісі. Сіздер жаңа жағдайда жақсы нәтижелер көрсетіп, нағыз ерлік таныттыңыздар», - деді білім және ғылым министрі А.Аймағамбетов.

Ол өз сөзінде оқушыларды білім нәрімен сусындатып, оқу барысында тынымсыз еңбек еткен ұстаздарға алғысын айтты. Сонымен қатар қиын кезде балаларына тіреу бола білген ата-аналардың да еңбегі өлшеусіз екенін атап өтті. Бас ұстаз қашықтан оқу кезінде жауапкершілік танытып, алғыр бола білген барлық оқушыларға ризашылығын білдірді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.