Алты жасар Жігер Берікбайұлы бір айдың ішінде 200-ден астам елдің астанасын, географиялық орны мен президенттерінің есімін жаттап алған. Әжесі Зиба Тәңірбергенованың айтуынша, Жігер 4 жасынан бастап әріптерді меңгеріп, кідірместен кітап оқуға бейім болған. Білімге құштарлығы артқан соң мектеп табалдырығын да ерте аттаған. Қазіргі таңда Мұнайлы ауданындағы №9 мектептің 1-сыныбын үздік аяқтап отыр.
Ойын баласы емес, ойлы бала болуға ұмтылған Жігердің әлем елдеріне деген қызығушылығы шағын атластан басталыпты.
«Әжем үй ауласынан атлас тауып алған еді. Атласты көргеннен соң ішін парақтадым, дүниежүзінің саяси картасына бірден көзім түсті. Барлығы қызықты көрінген соң әр елдің атын интернетке жазып, түрлі ақпараттармен таныстым. Осылайша ел астаналарын және оның орналасқан жері, өзіндік ерекшелігін жаттай бастадым», - дейді Жігер Берікбайұлы.
Жігер бос уақытын тиімді өткізуге дағдыланып келе жатыр. Айтуынша, спортпен щұғылданғанды ұнатады. Ал смартфонды өз қажетіне ғана қолданып, ғаламторды тиімді пайдаланады екен.
«Телефонды ойын ойнау үшін ұстамаймын. Ютуб желісінен әлем елдері туралы айтылатын қызықты видеоларды көргенді ұнатамын. Одан бөлек білімімді арттыру үшін сол елдегі жан-жануарлар мен құстар әлемі жайлы ақпараттарды оқимын», - дейді Жігер.
Әжесінің айтуынша, бала тәрбиесіндегі ең басты қателік – баланың таңдауына, қалауына қысым жасау. Сондықтан да Жігердің ізденімпаздығын аңғарған ата-анасы әрдайым қолдау білдіруге тырысады. Әсіресе әжесі Зиба немересінің әрбір пікірін тыңдап, іс-әрекетіне зер салып, бірге жаңаны үйренуге ұмтылады екен.
«Бастапқыда немеремнің қайта-қайта смартфон сұрауын дұрыс түсінбей, телефон ұстауына тыйым салған едім. Ертесіне Жігердің мазасы қашып, ауырып қалды. Ал телефонды қолына ұстатып, қалауын орындаған соң денсаулығы қалыпқа келді. Сонда ойландым, баланың таңдауына, қалауына ешқандай шектеу қоймау керек екендігін. Бала еркіндікте өссе, оның ойы, өзіндік пікірі қалыптаса бастайды. Сондай-ақ өз қызығушылығын әрі қарай арттыруға бар зейінін салады екен. Жігер еркіндікті ұнатады. Телефонды, ғаламторды тиімді пайдаланады. Сондықтан да оның жақсыны үйренуіне қашан да қолдау білдіремін», - дейді әжесі Зиба Тәңірбергенова.
Жігер әлем елдерімен таныса келе алдына мақсат қойып үлгерген. Оның ендігі мақсаты – шет тілін меңгеріп, әлем елдеріне саяхат жасау. Арманы да – саяхатшы немесе өрт сөндіруші мамандығын игеру.
«Маған Швейцария, Канада, Норвегия сынды мемлекеттер ұнайды. Себебі олар – өте таза. Ең бірінші сол қалаларға саяхаттағым келеді. Ата-анамды да өзіммен бірге алып жүремін», - деп өз жоспарымен бөлісті.
Алғыр Жігер бұдан бөлек араб әліпбиі мен Алланың 99 көркем есімін жаттаған. Ал діни сауаттылығының артуына әкесі Берікбай Өмірбаев көмектесіп жүр.
Жігердің талпынысы, оның білім мен ғылымға сүйіспеншілігінің ерте оянуы тек ата-анасының ғана емес, баршаға ортақ жетістік екені анық. Себебі білім мен ғылым – ел болашағының мықты іргетасы. Ал білімді ұрпақ – ертеңгі болашақтың кепілі. Демек, әр өңірде зерек, таланты мен талабы тоғысқан тұлғалар ер жетсе, ел еңсесі – биік, ертеңі – жарқын болары сөзсіз.
Жұлдызай ҚАЛИЕВА
Суретті түсірген Талант ҚҰСАЙЫН
Монтаж жасаған Ақерке ГАГАРИНҚЫЗЫ
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
