Каспий жағалауындағы Rixos Aktau қонақүйі қашан ашылатыны белгілі болды

Каспий жағалауындағы Rixos Aktau қонақүйі шілде айында ашылады. Бұл туралы ҚР Мәдениет және спорт министрлігі Туризм индустриясы комитетінің төрағасы Дастан Рысбеков айтты, деп хабарлайды mangystaumedia.kz сайты ҚазАқпаратқа сілтеме жасап.

«Жоспарға сәйкес, бұл қонақүйді шілде айының басында ашу көзделген. Кейбір туристік операторлар туристік жолдамаларын сатып та жатыр. Бір жерлерден жолдама құны 256 мың теңге көлемінде екенін байқап қалдым. Оған 2 және 3 күн кіреді. Дегенмен, жолдама құнына әуе билетінің бағасы да кіретінін ескерген жөн. Бұл жолдамалардың қысқа мерзімді екендігін ескерер болсақ, әуе билетінің бағасы 40 пайызға жетіп қалуы мүмкін. Бұған қоса, бұл құнға all inclusive жүйесі бойынша тамақтану да кіреді», - деді ол Орталық коммуникациялар қызметіндегі брифинг барысында.

Оның атап өтуінше, бұл қонақүйде жолдама бағасы шетелдегі дәл осындай қызметке қарағанда біршама төмен болатыны анық.

«Егер мысал ретінде жолдаманы 7-10 күнге есептер болсақ, онда бағасы шетелдік баламаға қарағанда біршама төмен шығады. Қазіргі уақытта 3 тәулікке Түркияға не болмаса Мысырға сапарлайтын болса, онда дәл қазіргі кезде Rixos Aktau қонақүйі ұсынып отырған бағадан әлдеқайда асып түсетіні анық», - деді Дастан Рысбеков.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.