Шайырлық шебер: "Халықтың ықыласынан шабыт аламын"

Қазақтың ұлттық қолөнері десе, балқытып соғылған зергерлік бұйымдар, моншақпен әсемделген әшекейлер, кестеленген, ою-өрнекпен бедерленіп жасалған дүниелер көз алдыңа елестейді. Зергердің қызыл шоққа темір балқытып әшекей жасағаны, шебердің қамшы өргені мен әже-апаларымыздың сырмақ сырып, киіз басып, текеметке ою салған көрінісі көз алдыңа тамаша бейнені әкеледі. Руханилықтың түп қазығы болып саналатын қолөнерді жанына серік еткен жандар қаншама?! Бірақ бүгінде өнердің бұл түрімен айналысатын адамдарды көп кездестіре бермейміз. Менің бүгін назарларыңызға ұсынғалы отырған мақалам ұлттық өнерді ұлықтап жүрген шайырлық Айгүл Тоқбаева жайында болмақ.  Ол тұрақтылық, бастаған ісін аяқтау, шыдамдылық, еңбекқорлық сияқты қасиеттерге ие. Келін болып түскеннен кейін ауылдағы әкімшілік аппаратында қызмет жасаған ол қазір жеке кәсіпкерлікке бет бұрып, ауыл халқының алғысын арқалап жүрген жайы бар. Оның үйіне қай кезде бара қалсаң, қолынан сабақтаулы инесі мен түрлі-түсті матасы түспей, шұқшиып отырады. Ол тұтас бір әулеттің келіні, қызғалдақтай 3 қыз тәрбиелеп отырған ана. Келіндік, аналық міндетімен қоса қолөнерді де қатар алып жүр. Оның жасаған бұйымдары дүкен сөрелерінде тіпті бір күн де тұрмай өтіп кетеді. Тігісін жатқызып, әдемі ою-өрнекпен айшықтап тіккен әр бұйымы кез-келгеннің көңілінен шығатыны анық. Шебердің қолынан шыққан бұйымдарға Шайырдан бөлек Құрық, Ақтау, Жетібай өңірлерінен де күнде тапсырыстар түсіп жатады. Кейде түскен тапсырыстарға үлгермей жататын ол қасына көмекші қыздар алып, бұл өнердің қыр-сырын үйретуде. Әуелде әжесінен үйренген өнерді дамытқан ол «Қолөнермен айналысатын адамның бойынан шыдамдылық, халықпен жұмыс жасап білу және жан-жақтылық және шабыт керек, ал мен шабытты халықтың ықыласынан аламын», - дейді. Әзірге өз қаражатымен кәсібін дөңгелетіп отырған Айгүл алдағы уақытта мемлекеттен беріліп жатқан көмекке қол жеткізіп, несие алса, кәсібін кеңейтіп, қосымша жұмыс көзін де көбейтетіндігін жасырмайды. - Қазіргі таңда Шайыр ауылынан шеберхана салуға жұмыстанып жүрмін. Табысым әзірге құрал-жабдықтарды түгендеуге жұмсалуда. Астана қаласындағы брендтік аяқ киім өндіруші Самғау Нәсіпханұлынан шеберлік сабағын оқыдым. Енді тек тігіншілікпен айналысып қана қоймай, аяқ киім өндірісін жолға қойып, шеберхана ашпақ ойым бар. Табыс көзі - кәсіпкерлікте, - дейді. А.Тоқбаева. Халқымыздың ертеден келе жатқан өнерінің бір түрі қолөнерді жанына серік еткен Айгүл шебердің арманы биік. Жас кәсіпкерге бізде қазақтың қолөнерін дамытып, мақсатыңызға жетіп, армандарыңыз орындала берсін деп тілек білдіреміз!

Данагүл АЛИЕВА