Тегін дәрі кімге тиесілі?

©

Аудан әкімінің жыл сайынғы есеп беру кездесуімен ауылдарды аралаған кезде тұрғындар тарапынан көп қойылған сауалдардың бірі тегін дәрі-дәрмек жайында болды. Бүгінгі мақаламыз тегін дәрі-дәрмек кімдерге тиесілі және ол қалай беріледі, сол жайлы болмақ. Қазіргі таңда заман көшіне ілескен медицинаның мүмкіндігі мен әлеуеті зор. Халық арасында кеңінен таралған созылмалы дерттің алдын алу жоспарлы түрде жүзеге асады. Осы ретте мамандандырылған және учаскелік дәрігердің диагноздық анықтамасынан кейін есепте тұрған және мүгедектігі жөнінде арнайы сараптамалық қорытындысы бар, науқасқа мемлекет тарапынан тегін немесе жеңілдетілген дәрі-дәрмек беріліп отырады.

«Аталған жеңілдікті аудан тұрғындары қаншалықты деңгейде пайдасына жаратып жүр?» деген сауалға жауап іздеу мақсатында тиісті сала маманына жолығуды жөн деп, Маңғыстау аудандық аурухана директорының емхана жөніндегі орынбасары Д.Бекиеваны сөзге тартқан болатынбыз.

- Динара Әзірбайқызы, бірден басты сұраққа көшейін, ауданда тегін дәрі-дәрмекпен қамтылып отырғандардың саны қанша, жалпы тегін дәрі кімге тиесілі? - Елімізде аурудың қай түріне болмасын, оның алдын алу және емдеу үшін пайдаланатын дәрі-дәрмек бар. Ұлт саулығының жақсаруына бірден-бір себепкер медицина маманы қай кезде де уақытылы дәрі-дәрмекпен халықты қамтамасыз етуге мүдделі. Жалпы алғанда Маңғыстау ауданында артериальды қан қысымымен - 1168, жүректің ишемиялық ауруымен - 119, қант диабетімен - 250, оның ішінде инсулинге тәуелді қант диабетімен - 29, бүйрек жетіспеушілігімен - 17 адам диспансерлік есепте тұр. «Тегін медициналық көмектің кепілдік берілген көлемі шеңберінде және міндетті әлеуметтік медициналық сақтандыру жүйесінде азаматтарды, оның ішінде белгілі бір аурулары бар азаматтардың жекелеген санаттарын амбулаториялық деңгейде тегін немесе жеңілдікпен берілетін дәрілік заттармен, медициналық мақсаттағы бұйымдармен және мамандандырылған емдік өнімдермен қамтамасыз етуге арналған дәрілік заттардың және медициналық мақсаттағы бұйымдардың тізбесін бекіту туралы» Қазақстан Республикасы Денсаулық сақтау министрінің 2017 жылғы 29 тамыздағы №666 бұйрығына өзгерістер енгізу туралы Қазақстан Республикасы Денсаулық сақтау министрінің 2018 жылғы 14 наурыздағы №105 бұйрығы Қазақстан Республикасының Әділет министрлігінде 2018 жылғы 16 наурыздағы №16618 бұйрығы болып тіркелді. Бұл бұйрық бойынша 48 ауру, оның ішінде әлеуметтік маңызы бар аурулар: артериальды гипертензия, асқазанның ойық жарасы, бронхиальды астма, қатерлі ісік аурулары, туберкулез, гематологиялық қан аурулары (гемабластоздар, аплазиялық анемия), балалардың церебральдық сал ауруы, психикалық аурулар, АИТВ инфекциясы және т.б ауру тізбелері бар. Дәрілердің жаңа тізбесі тиімділігі дәлелденген 59 жаңа дәрілермен толықтырылған 256 дәрілік заттардан, оның ішінде 385 дәрі түрлерінен тұрады. - Дәрілерге тапсырыс қалай жүзеге асады? - Маңғыстау аудандық орталық ауруханасының дәрі-дәрмектерін СК «Фармация» арқылы арнайы тапсырыспен алынады. Бұл тапсырыс электронды турде жүзеге асады. Келген дәрі-дәрмектерді емхана бөлімінде ИСЛО электронды порталмен рецепт толтыру және берумен синхрондалады. Келесі жылдың тапсырысы жыл аяғында жасақталып тапсырысқа беріледі. Жаңадан анықталған науқастар үшін қосымша тапсырыс жыл ортасында беріледі. Жалпы медицинада түрлі деңгейдегі ауру түрі пайда болу үстінде. Дертпен күресте сан алуан дәрі-дәрмекті тұтыну жиілігі сезіледі. Ал қарапайым халықтың қымбат дәріні алуға қалтасы көтере бермеуі ықтимал. Ай сайын бақылауда тұратын әрбір науқас учаскелік дәрігерге тексеріліп, өзіне қажеттісін алып отырады. Бұлардың қатарында көш бастап тұрғаны артериалдық қан қысыммен ауыратын жандар. Халықтың әлеуметтік тұрмысын ескере отырып, ағза алмастырған кей науқасқа қымбат тұратын дәрі-дәрмек жоспарлы түрде жеткізіліп отырады. - Ал осы жөнінде халықты ақпараттандыру жұмыстары қалай жүргізілуде? - Мемлекет тарапынан көрсетіліп отырған жеңілдіктер жайында тұрғындарды ақпараттандыру, оларды осы әдіс бойынша дәрі-дәрмек алуға үйрету жұмыстары әлі де жүргізілуде. Десек те тұрғындардың берілген дәрілерді дер кезінде қабылдамай, өз денсаулығына салғырт қарауы денсаулық саласындағы өзекті мәселелердің бірі болып отыр. Сонымен қатар созылмалы аурулары бар науқастар дәрігерді үйге шақырту үшін мына телефонға хабарласуларыңызды сұраймыз: 50-6-86. Арыз шағымдарды қабылдау телефоны call center: 50-8-11. Ал әлеуметтік желілер арқылы тұрғындарының назарына телімдік жалпы тәжірибелі дәрігерлердің күнделікті жұмыс кестесін ұсынып отырмыз. - Сұхбатыңызға рахмет!

Айгүл РАХМЕТОВА