Таушық ауылында 100 балаға арналған балабақша ашылды

Облыс әкімі Ералы Тоғжанов жұмыс сапарымен Түпқараған ауданында болып, 1 желтоқсан – Тұңғыш Президент күні бірнеше жаңа нысанның ашылу рәсіміне қатысып, жұмыс жасап тұрған бірнеше жұмыс орнымен танысты.

Түпқараған ауданындағы жұмыс сапарын Таушық ауылынан бастаған облыс әкімі, облыстық мәслихат хатшысы Серікбай Тұрымов алдымен Таушық аулында жеке кәсіпкер Айбек Қосауақовтың жеке қаржысына бой көтеріп, ашылғалы отырған жеке меншік 100 балаға арналған «Күншуақ» балабақшасының ашылу салтанатына қатысты. Баланстық құны 406 миллион теңге жаңа балабақшаға 37 қызмектер алынып үлгерген. Оның сегізі тәрбиеші. Эстетик, психолог, сияқты мамандар бар. Балабақшада «Болашаққа бағдар: Рухани жаңғыру» бағдарламалық мақаласы негізінде «Этнокбинет» жасақталған. Шаңырақ көтеріліп, кереге керіліп, уық тіктелген арнайы бөлменің негізі ұлттық нақышта жасалып, салт–дәстүрге сай және тәрбиеші біліктіліктерін арттыру бағытындағы сабақтар өткізілу жоспарлануда. Бұл жөнінде облыс әкіміне арнайы жеке кәсіпкер Айбек Қосуақовтың анасы таныстырып өтті. Балабақша жаңа типтік жобада, заманауй жиһаздармен жабдықталып, бала ойын дамытатын ойыншықтармен толықтырлыған. Бұған дейін де ауылда бір мемлекеттік балабақша болса, бұл ауылда бой көтеріп отырған тұңғыш жеке балабақша. Сонымен қатар, үйде отырған ауыл келіншектеріне жаңа жұмыс орны болып құрылған балабақшаның құрылысы да сапалы материалдардар пайдаланылуымен салынған. Оны жеке кәсіпкер Айбек Қосуақов облыс әкіміне таныстыру барысында өзі атап өтті.

- Еліміздің бірлігінен асқан аса қадірлі ұғым жоқ. Қазақстанның өсуі де, өнуі де бірлік пен елдіктің арқасы. Соның арқасында экономика көтерілді. Бір аудан бойынша балабақша мәселесін толық шешуге жағдай жасалып жатыр. Осындай балабақшамен 98 пайыз деңгейде қамтамасыз етуге жеткелі отырмыз. Яғни кішкентай бүлдіршіндерге жақсы жағдай жасай алсақ, соның бәрі тәуелсіз Қазақстанның жаңа мүмкіндігі болмақ,- деді сөз алған облыс әкімі Ералы Тоғжанов.

Балабақша жұмысымен танысып өткен облыс әкімімен арайы кездесуге жиналған Сағатов Күшікбай ақсақал бастаған ауыл ақсақалдары ауылдың бүгінгі тынысы кеңейіп, еліміздің өркендеп келе жатқанын сөз етіп, алғыстарын жеткізіп, жүн, тері өңдеу мен балшықпен емдеу бойынша жұмыстар жанданса деген тілектерін жеткізді. Ақсақалдар алдында сөз алған облыс әкімі облыста бірнеше жұмыстар қолға алынып жатқанын таныстырып, Бекет атаға барар қотыр жолға асфальт төсеу жұмыстары басталғанын, болашақта Қытайдан Еуропаға өтетін жүктің көлемі 62 пайызға артатындықтан,оған Маңғыстау арқылы жол ашылатындығын атап өтті.

- Болашағы зор жобаларды Елбасы өзі бастап беріп, қиын жағдайларға қарамай теміржолды қолға алып, Қытайдан мына Ақтауға дейін алып келді. Оны Ресей арқылы да апаруға болатын еді. Елбасымыз соны бірінші болып осы қазақ жері арқылы өтуіне жұмыстанды. Себебі елдің бәрі алдымен жағдай жасалған, жолы қысқа жермен жүруге тырысады. Бұл тұрғыда біздің облыс өте қолайлы. Әрбір өткен жүк көлемі - облысқа түсіп отыратын пайда. Сондықтан жолдар бойынша жұмыстар жасалуда, - деп атап өткен облыс әкімі Ақшұқыр мен Ақтау арасындағы жолдың көлік көптігіне байланысты қолға алынатындығын да жеткізді. Сонымен қатар «Даму» қоры арқылы және банктер басшыларымен кездесіп, 1 пайыздық несиемен ақша беруді қолға алынған жұмыстардың барысын таныстырды.

- Англияның өзінде төмен несие - 3 пайыз. Біз бір пайызбен өңірдегі шағын және ора бизнесті көтеруді ұйғарып отырмыз. Себебі мұнай байлық емес, ол шикізат қана. Шикізат таусылған күні жұмыс та тоқтайды. Сондықтан ел өз кәсібін ашып, қымет қылуға тырысуы керек. Сол бағытта жеке ұйымдармен келісіп, 900 миллион ақша таптық,олар 1 миллиард үстінде ақша бөлуі керек. Сонымен жалпы ақша көлемі 2 миллиард 700 млн ақшаға орта және шағын бизнесті дамыту жұмыстары басталмақ, -деді облыс әкімі шағын бизнесті дамыту бағытындағы жұмыстардың қолдауына тоқталып. Ақсақалдар көтерген мәселе бойынша кәсіпкерлер аталған қолдауды қолданып, өңдеу мен өндіру, қызмет көрсетудің жаңа түрлерін аша алатындығын жеткізді. «Сонда осы мәселелер де шешімін таппақ» дейді ол.

Милана ЕЛЕУСІНОВА

Суреттерді түсірген Серік МАЙЕМЕРОВ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.