Халықаралық радиолог және рентгенолог күні қарсаңында Маңғыстау облысы ауруханасы радиология бөлімінің меңгерушісі Ануар Жақсыадаймен сұхбаттастық.
Ануар Жақсыадай – радиолог-дәрігер, радиология бөлімінің меңгерушісі. Облыстық ауруханада 2015 жылдан бері қызмет етіп келе жатыр. Қазіргі таңда радиология бөлімінде барлығы 39 маман қызмет етеді. Орта, кіші медицина қызметкерлерден бөлек 13 дәрігер бар. 1 радиолог және 3 рентгенолог бар. Олай болса, радиология бөлімінің мүмкіндігі қандай, сұхбаттан біле аласыз.
– Радиология бөлімінің міндеті не, қандай жұмыспен айналысады?
– Радиология бөліміне компьютерлік томография (КТ) мен магнитті резонанстық томография (МРТ) кіреді. Негізгі міндетіміз – сәулелі диагностика жасау, ол ішкі ағзалардың бейнесін алуға мүмкіндік беретін рентгендік зерттеу. Осы томографиялық зерттеу аясында біз адам ағзасының қаншалықты зақымданғанын я зақымданбағанын анықтаймыз. Кейін зерттеу нәтижесіне байланысты дәрігерге қаралуға, емделуге жібереміз.
– Қазіргі таңда облыстық аурухананың радиология бөлімінде қандай құрылғылар бар? Жеткілікті ме?
– Облыстық ауруханада ең қажетті әрі соңғы үлгідегі құрылғылар бар, жеткілікті. Десе де жаңартуды қажет етеді. Пандемия кезінде мұнай компаниясының демеушілігімен КТ аппараты жаңаланған болатын. Атап айтқанда 160 бөлімнен бір уақытта мәліметтер жинау мүмкіндігі бар Aquilion Prime SP жаңа компьютерлік томографы берілді. Бұл облыста бар ең мықты құрылғының бірі. Одан бөлек түрлі рентген аппараты бар. Күн сайын дамып, алға жылжып келе жатырмыз. Жақында тағы жаңа құрылғыны алу жоспарланып отыр.
– КТ мен МРТ-ға жиі түсу қаншалықты зиян?
– Негізінде КТ-ға көп түсу – зиян. Сондықтан белгілі бір норманы сақтап, тұрғындарды қабылдаймыз. Ал аз дозалы компьютерлік томография деген бар, онда тексерілу қауіпті емес. Магнитті резонанстық томографияның (МРТ) еш зияны жоқ. Оған алаңсыз түсе беруге болады.
– Диагнозды қалай анықтайсыздар? Қандай диагноз жиі кездеседі?
– Радиолог пен рентгенологтарды әмбебап маман десек те болады. Себебі бір ғана нәрсені қарамаймыз, барлық ағзамен жұмыс істейміз. Бас, аяқ, ішкі ағзалар, онкология, тіпті пандемияның кезінде пульмонолог та болып кеттік.
Кез келген травма алған адамның бәрі алдымен осы радиология бөлімінен өтеді.
– КТ немесе МРТ түсу үшін науқасқа қандай дайындық керек?
– Алдымен науқасқа дәрігердің нұсқау қағазы керек. Алдын ала бір күн бұрын біздің бөлімге жазылады, сол уақытта мамандар түсіндіру жұмыстарын жүргізеді. Көбінесе, контрастпен түсу керек болса, науқас тамақ ішпей келуі керек. Су мен тамақты 4 сағат бұрын тоқтатуы маңызды. Іш қуысы, кіші жамбас органдарын және бүйректі тексеру кезіндегі сеанс алдында арнайы дайындық қажет. Ол үшін ішекті тазартуға бағытталған шараларды өткіземіз. Сонымен қатар балық пен иодқа аллергиясы болмауы керек.
Ал МРТ түсу керек болса, онда эпилепсия сынды аурулар болмауы қажет. Себебі адам МРТ түсу кезінде қозғалмағаны маңызды.
– Тұрғындар қандай жағдайда қызметті тегін пайдалана алады? Ақылы қызмет қанша?
– Қазір тұрғындардың көбі радиология бөлімінен тегін қызмет алып жүр. Әлеуметтік пакеттер арқылы, одан бөлек емханада тіркеуде тұрғандар дәрігердің нұсқамасы арқылы келіп, тегін тексеріле алады. Оған қоса ақылы қызмет те қарастырылған. Ол кезде кезек күтуі мүмкін. Пандемия кезінде адамдар көп келгендіктен 24 сағат бойы қызмет еттік. Біздің бір ерекшелігіміз – КТ немесе МРТ түскен бойда бірден нәтижесін шығарып береміз.
МРТ түсу 20 000 теңге шамасында болса, КТ – 10 000 теңге мен 15 000 теңге аралығында. Яғни әр органды томографиядан тексеруге қарай арнайы баға бекітілген.
– Ақпарат үшін рақмет!
Сұхбаттасқан Жұлдызай ҚАЛИЕВА
Сурет автордан
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
