Маңғыстау облысы Шетпе ауылының жасөспірімдері Біріккен Араб Әмірліктерінде джиу-джитсудан өткен Азия чемпионатынан жүлдемен оралды, деп хабарлайды mangystaumedia.kz.
Қоғамдық коммуникация орталығының хабарлауынша, Азия біріншілігінде бақ сынаған маңғыстаулық 8 спортшының алтауы жүлделі орынға ие болды. Бапкерлері Азамат Кайлыбаев, Максим Төребай,Шапағат Өтепбергенов, ал жас спортшылар Рамазан Есболат, Әдебиет Ерсұлтанов, Ақниет Закарина жеңімпаз атанды. Сондай-ақ, Нұржан Салауат мен Тілектес Саматқызы II орынға тұрақтады. Онымен қоса Ерасыл Нұрланұлы қола жүлдені қанжығасына байлады.
Жеңімпаз Әдебиет Ерсұлтанов жарыс жөнінде өз әсерімен бөлісті.
- Жасөпірімдер арасында бірінші рет Азия чемпионаты өтіп жатыр. Бұл 56 келі салмақ дәрежесінде өтіп жатқан соң салмақ қуып, көп жаттығу жасадық. Қарсыластарым Ирак мемлекетінен болды. Барша жақындарымның қолдауының арқасында чемпион атандым. Ендігі мақсатым қазан айында Греция мемлекетінде өтетін Әлем чемпионатына қатысып жеңімпаз атану, - деді Әдебиет Ерсұлтанов.
Сонымен қатар, жастарды күтіп алуға ата-аналарымен қоса Маңғыстау облысының депутаты Пания Сармурзина және Маңғыстау ауданы Мәдениет басқармасы басшысы Маржан Дуланова қолдау білдірді. Сондай-ақ, Маңғыстау ауданы Шетпе ауылы әкімі Амалбек Жанбуршиев өз құттықтауын жеткізді.
«Бүгінгі жеңіс әрқайсымыз үшін ерекше. Маңғыстау жастарының жоғары дәрежеде жетістіктерге қолжеткізгені біз үшін мақтаныш! Жеңімпаздарды шын жүректен құттықтай отырып, биіктерден көріне беріңдер деп айтқым келеді», - деп атап өтті Амалбек Жанбуршиев.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
