Маңғыстау спортшылары Халықаралық Олимпиада күнінде ерекше құттықтау жолдады

23 маусым - Халықаралық Олимпиада күніне орай олимпиада спорт түрлері бойынша Ш.Бөлтекұлы атындағы жоғары спорт шеберлігі мектебінің спортшылары құттықтау жолдады, деп хабарлайды mangystaumedia.kz.

Мереке қарсаңында жолданған видеоның басты идеясы жас буынның болашақта Олимп шыңына қарай нық мақсаттарын және Жоғары спорт шеберлігі мектебінің тұжырымдамасы «қозғалыс, сенім, болашақ энергиясына» негізделетінін көрсетеді.

13 олимпиадалық спорт түрлерін қамтитын облыстық Жоғары спорт шеберлігі мектебінде іріктелген үздік спортшылар жаттығады.

«Мемлекет олимпиада қозғалысын дамытуға әрдайым баса назар аударады. Бұл күн кез-келген жастағы адамның, оның жынысы мен атлетикалық қабілеттеріне қарамастан, спортпен шұғылдануға тиісті екендігін білдіреді. Оған қоса, биыл - кезекті Олимпиада ойындары өтетін жыл. Сондықтан біз осы халықаралық доданың мағынасын жете түсініп, оның рухына бойлай білуіміз керек. Олимпиада жеңімпаздарының үлгісі бүкіл әлемдегі миллиондаған баланы спортпен шұғылдануға жігерлендіреді. Баршаңызды халықаралық Олимпиада күнімен құттықтаймын!», - деді Ш.Бөлтекұлы атындағы жоғары спорт шеберлігі мектебінің басшысы Жандарбек Исанов.

Тарихқа үңіліп қарасақ, 1894 жылы маусымның 23-і күні әлемге әйгілі Пьер де Кубертен және оның серіктестері Олимпиада ойындарын жаңғыртып, Халықаралық Олимпиада комитетін (ХОК) құрған болатын. Ал 1948 жылы ХОК- тың 42-сессиясында «Олимпиада күнін» әлем бойынша атап өту туралы шешім қабылданды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.