Маңғыстаулық жас гимнасшылар Бакуден жүлдемен оралды  

12-15 маусым күндері Бакуде жас гимнасшылар арасында "Gimkids Cup" халықаралық турнир өтті. Аймақ атынан «Жас батыр» спорт мектебінің арулары бақ сынады. Жарыста маңғыстаулық спортшылар 3 алтын, 4 күміс және 6 қола медальмен оралды, - деп хабарлайды mangystaumedia.kz сайты. Турнирге Ресей, Украина, Германия, Грузия, Өзбекстан және Қазақстан, Әзірбайжан елдерінен 500-ге жуық қатысушы келген. Жарыста 2007-2010 жылғы жасөспірімдер қатысты. 2010 жылы туған қыздар арасында А тобынан Саида Дәуренқызы және С тобындағы Аққуым Манарбекқызы алтын жүлдені иеленді. Ал 2009 жылы туған қыздар арасында С тобында өнер көрсеткен Назгүл Ерімбет алтын медаль алды. 2007-2008 жылдары туған қыздар арасында өткен додада маңғыстаулық спортшылар 2 күміс және 5 қола жүлдені қанжығасына байлады. Осылайша Маңғыстаудың намысын қорғап барған жас гимнасшылар командалық есепте қола жүлдемен 3-орынға жайғасты. Бапкер Бибігүл Ерназарованың айтуынша, гимнасшылар аймақ абыройын асқақтатып, жүлдемен оралды. Осы орайда гимнасшыларды жарысқа жоғары деңгейде дайындап, халықаралық аренаға шығарып жүрген «Жас батыр» спорт мектебінің білікті бапкері Жадыра Перниязоваға және Маңғыстау облыстық көркем және эстетикалық гимнастика федерациясының ұжымына алғыс білдірді.

Жұлдызай ҚАЛИЕВА

Суреттерді ұсынған «Жас батыр» спорт мектебі