Ақтауда мүмкіндігі шектеулі жандарға арналған спорттық секция ашылды

Ақтаудағы 27 шағынауданда орналасқан мүмкіндігі шектеулі жандар спорт клубының ғимаратында «Бочча» атты адаптивті спорттық секциясы ашылды, - деп хабарлайды mangystaumedia.kz сайты.

Бочча – бұл бәсекеге қабілетті және рекреациялық адаптивті спорт түрі, мүгедектерге физикалық қабілеттерін, ептілігін, дәлдігін, төзімділігін, қозғалыстарды үйлестіруді дамытуға және қоғамда әлеуметтенуге көмектесетін доп ойыны.

Бұл бөлімге аутизм, Даун синдромы және тірек-қимыл аппараты бұзылған балалар үнемі қатысады.

Секция Маңғыстау облысының дене шынықтыру және спорт басқармасының көмегімен «Тең мүмкіндіктер әлемі» қоғамдық қоры жүзеге асыратын «Саламатты болашақ» әлеуметтік жобасы аясында іске қосылады.

Жобаның Бас серіктесі – «Samruk-Kazyna Trust» әлеуметтік жобаларды дамыту қоры мен жоба демеушісі «MYD Production» ЖШС.

Бүгінгі таңда «Тең мүмкіндіктер әлемі» қоғамдық қоры Қазақстанның 9 қаласында (Нұр-Сұлтан, Алматы, Шымкент, Павлодар, Қарағанда, Ақтөбе, Ақсу, Жанарқа) ерекше қажеттіліктері бар 600 балаға бочча, адаптивті каратэ, инклюзивті хореография, жеңіл атлетика, голбол, адаптивті таэквондо және дзюдо, адаптивті футбол сияқты спорт түрлерінен секция ашты.

Жоба аясында, жобаның бас серіктесінің қолдауымен жаттықтырушылар адаптивті дене тәрбиесі бойынша ақысыз оқудан өтеді. Арнайы құрал-жабдықтар, оқу-әдістемелік құралдар алады және жұмысқа орналасады.

Айта кетейік, Маңғыстауда спортпен тұрақты шұғылданатын мүмкіндігі шектеулі 706 адам бар. Бұл көрсеткіш 2019 жылмен салыстырғанда 59 адамға өскен. Мүгедектер спорт клубында спорттың 18 түрімен айналысады. Сонымен қатар 2021 жылы бассейн жалға алу арқылы 30 спортшыны жұмыспен қамту және 5 спорт түрінен штат ашу жоспарланып отыр.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.