Нұркен Өтеуілов "Маңғыстау театры жайлы пікірім өте жоғары"

Қаллеки театрының Ақтаудағы гастролі «Қараш-Қараш», «Шәмші» қойылымдарымен басталды. Екі спектакльде де басты рөлді сомдайтын театр әртісінің репетициясына кедергі болмайық дедік. Сөйтіп кино және театр актері, эстрада әншісі, Қазақстанның еңбек сіңірген қайраткері, Қалибек Қуанышбаев атындағы қазақ мемлекеттік академиялық музыкалық драма театрының актері Нұркен Әшімханұлымен үшінші күні әңгімелесудің сәті түсті.

- Алғашқы екі қойылымды қойдыңыздар. Халық қалай қабылдады?

- Иә, екі қойылым өтті. Ақтау қаласына бірінші рет емес, бірнеше рет келгенмін. Жалпы қазіргі көрерменнің талғамы өте биік. Сол талғамнан шығу үшін де бізге үлкен біліктілік керек. Сондықтан екі жақтың да көрермені өте парасаты биік, талғамы жоғары. Қойылымдарымызды, шүкір, зор қошеметпен қабылдап жатыр.

- Бұрын Ақтауға қандай шараларға келген едіңіз?

- Осыдан 5-6 жыл бұрын да гастрольдік сапар болған. Одан кейін қазақтың маңдайына біткен жазушысы – Әбіш ағамыздың атындағы республикалық театр фестивалі өтті ғой. Сонда әділ қазылар алқасында болдым.

- Н.Жантөрин театрының қай қойылымдарын ерекше атап өтер едіңіз?

- Менің әрқашан да Ақтау театры туралы пікірім өте жоғары. Қазақстанда 54 театр болса, соның алдыңғы орындарының бірінде тұр. Бірнеше жылдық тарихы бар театрлардың жетпей жатқан деңгейіне осы 15 жылдың ішінде Маңғыстау облысының театры қол жеткізіп жатыр. Қаншама рет халықаралық, республикалық фестивальдерде өзіміз куә болдық. Мұның бәрі тынымсыз еңбектің, ұжым мен актерлік құрамның мықтылығының арқасы деп білемін. Әрқайсысы «Сен тұр, мен атайын» деген актерлер мен актрисалар. Сол себепті бұл театрдың деңгейі өте жоғары деп есептеймін.

- Енді жеке шығармашылығыңызға келсек. Театрда ойнайсыз, киноға түсіп жүрсіз, фильмдерді дыбыстайсыз. Дегенмен соңғы уақытта халық әнші Нұркенді, «Бәйтерек» тобының әндерін сағынған сыңайлы. Неге ол топты көрмей кеттік?

- Бұл – жиі қойылатын сұрақ (күліп). «Бәйтерек» тобы да біздің жанымызда. Мен өзімді театр сахнасынан таптым деп білемін. Топтағы жігіттер де сол ойда. Біздің негізгі мамандығымыз актер болғандықтан, бұл бағытта бізге үлкен есік ашылды. Соның бірі – театр сахнасы. Осыған көбірек күш салып, көңіліміз осы жаққа тартып тұрғандықтан, қазір театр саласында жүрміз.

- Қарттығыңызды қалай елестетесіз?

- Алдағыны болжай алмаймын. Кім болатынымызды, қанша ғұмыр беретінін бір Алла біледі. Бірақ, әйтеуір, аман жүрсек, «Қазақ өнеріне талмай қызмет ету» деген азаматтық, актерлік позициям бар, соған жеткім келеді.

- Ұлдарыңыз да ізіңізді қуып келеді. Олардың өнерге келуіне көзқарасыңыз қандай?

- Ешқандай қарсылығым жоқ. Балалар қандай саланы таңдайды, мен қолдаймын. Әкелік жол көрсету – менің парызым. Олардың да маңдайына не жазды, сол болады ғой.

- Сіз үшін ұзақ дайындықты қажет еткен қойылым болды ма?

- Жалпы қазіргі заман ұзақ дайындалуды қажет етпейді. Уақыттың өзі - тез өтіп жатқан кезең. Шама жеткенше жылдамырақ қимылдауды талап етеді. Сондықтан да аз уақыт аралығында дайындалу жетеді негізі. Біздің ұзақ дайындалғанымыз – У.Шекспирдің «Отелло» қойылымы. Үш жарым айға созылды. Ал басқа спектакльдер бір-бір жарым айда шығып отырады.

- Ақтау қаласы ұнап жатыр ма? Қыдырып үлгердіңіз бе?

- Ақтау ерекше қала ғой. Қарт Каспийдің жағасында жүріп, таза ауамен тыныстаудың өзі бір ғажап. Судан адамның санасы демалады, энергия алады. Сол жағынан алғанда қатты ұнайды. Бірақ әлі қыдыруға үлгермедік. Алда екі күніміз бар, жақсылап аралаймыз деген ойдамын.

- Жақсы, аға. Әңгімеңізге рақмет. Сәттілік сізге!

Теңге БЕКМҰРЗАЕВА

Суреттерді түсірген Талант ҚҰСАЙЫН

[gallery td_select_gallery_slide="slide" ids="52224,52222,52221,52220"]