Республикалық айтыста Нұрлан Мұсаев бас жүлде иеленді

Бүгін Қызылорда қаласында өткен «Мәңгілік ел – мұратым» атты республикалық айтыста маңғыстаулық айтыскер Нұрлан Мұсаев бас жүлде иеленді, - деп хабарлайды mangystaumedia.kz сайты.

Аламан айтыс ҚР Тәуелсіздігінің 30 жылдығына арналды. Жыр додасына Арқалықтан Айбек Қалиев, Ақтаудан Нұрлан Мұсаев, Атыраудан Шалқарбай Ізбасаров, Павлодардан Рауан Қайдаров, Өскеменнен Серік Қуанған, Нұр-сұлтан қаласынан Дәурен Ысқақов және Қызылорда қаласынан Ержеңіс Әбдиев, Сырым Әділбеков, Бексұлтан Орынбасаров, Жамбыл Бақытәлі бақ сынады.

Айтысты белгілі айтыскер ақын Нұрмат Мансұров жүргізді. Сөз бәйгесінде тәуелсіздік тағылымы, жетістігі мен жеңісі, рухани мұраның өміршеңдігі, жастардың отансүйгіштігі дәріптелді.

Дүбірлі додада маңғыстаулық Нұрлан Мұсаев Атыраудың ақыны Шалқарбай Ізбасаровпен айтысты. Нәтижесінде бас жүлдені қанжығаға байлады.

Ал 3-орын павлодарлық Рауан Қайдаров пен қызылордалық Ержеңіс Әбдиевке бұйырды. Өскеменнен барған Серік Қуанған 2-орын алса, Арқалық ақыны Айбек Қалиев пен атыраулық Шалқарбай Ізбасаров 1-орынды иеленді. Жүлдегерлер диплом және қаржылай сыйлықтармен марапатталды.

«Қазақ халқы өнердің төресін айтыс деп бағалаған. Айтыс – шын мәнінде біздің ата-бабамыздан келе жатқан ұлы өнер. Өнердің киелісі. Бүгінгі айтыстағы дүлдүлдер бірінен-бірі өтеді. Жасы бар, үлкені бар, айтыс сахнасында жүрген тәжірибелі ақындарды көрдім. Соның ішінде Шалқарбай Ізбасаров пен Нұрлан Мұсаевтың айтысы ерекше болды. Мен бұл айтысты таңды таңға, күнді күнге жалғап, тыңдап отыра бергім келді», - деп баға берді әділқазылар алқасының төрайымы Роза Мұқанова.

Айта кетейік, айтыста халықаралық «Алаш» әдеби сыйлығының лауреаты, Қазақстанның еңбек сіңірген қайраткері, жазушы, драматург Роза Мұқанова, Қазақстан Жазушылар Одағының мүшесі, Қадыр Мырза Әли атындағы мәдениет және өнер орталығының директоры, белгілі айтыскер ақын Бауыржан Халиолла және ҚР мәдениет қайраткері, ақын, режиссер-сценарист Оңталап Нұрмаханов қазылық етті.

Жұлдызай ҚАЛИЕВА

Суреттер Қызылорда қалалық мәдениет және тілдерді дамыту бөлімінен

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.