Автордың қатысуымен «Құнанбай мен Абай» пьесасы сахналанды

Кеше Маңғыстау облыстық Н.Жантөрин атындағы музыкалық драма театрында «Құнанбай мен Абай» пьесасы сахналанды. Алдымен пьеса авторы Есенғали Раушанов, облыстың мәдениет, тілдерді дамыту және архив ісі басқармасының басшысы Пәния Сармурзина, Музыкалық жас көрермен театрының директоры Асхат Маемиров, театр сыншысы Анар Еркебай және театр директоры әрі қойылым режиссері Гүлсина Мерғалиеваның қатысуымен брифинг өтті.

Брифинг барысында қойылымның ерекшелігі мен маңыздылығы сөз болды. Айта кетейік, «Құнанбай мен Абай» пьесасы Есенғали Раушановтың драматурия саласындағы алғашқы туындысы. Десе де төл туынды көптің көңілінен шығып үлгерді.

«Абай жолы» эпопеясында Мұқаң сомдаған Абай бейнесі, Мұқаң сомдаған Құнанбай бейнесі сіз бен бізге бала кезімізден етене таныс. Ал сіз бен біздің бүгінгі тамашалағалы отырған пьесасының ерекшелігі – Мұқаң жасаған бейнелерден қашып, өзгеше бейне жасауға талпындық. Бір нәрсені ашық айтайын, бұл дегеніміз ұлы Мұқаңды жоққа шығару деген сөз емес. Сондай-ақ «Абай жолын» жоққа шығару деген сөз емес. Бұл жаңа бір дүниеге деген талпыныс. Әдетте көркем әдебиеттің мұратын ешкімге ұқсамау деп қабылдаймын. Сондықтан да ерекше туынды шығаруға талпындым», - дейді ақын, жазушы Есенғали Раушанов.

Автор өз шығармасында Құнанбайдың қайраткерлігін, ақылдылығы мен көрегендігін ашып көрсеткен. Әке мен бала арасындағы байланысты ерекше көрсеткен, екі кейіпкер арасындағы жылулықты сипаттай білген.

«Абай мен Құнанбай біз өмір сүріп жатқан жарық дүниеге лайық па? Менің ойымша, Абайдың ұлылығы мына лас дүниеге лайық емес. Сондықтан да олар о дүниеде кездеседі, сырласады, оқиғаның барлығы басқа әлемде өтеді. Пьеса көрермендерге ұнар мүмкін ұнамас. Яғни әр адам өз Абайын жасап алады. Ал бұл шығармада менің Абайым бар», - деп атап өтті Есенғали Раушанов.

Аталған қойылым аз уақыт ішінде театр сүйер қауымға ұсынылды.

«Пьеса өзінің стилімен, айтар ойымен ерекшеленді. Жалпы біз көріп келе жатқан пьесаларда тарихи тұлғаларды тарихи шындықтың деңгейінде көруге тырысамыз. Ал бұл пьесаның бір өзгешелігі – нақты уақыт көрсетілмеген, ғарыштық деңгейде өтіп жатқанымен қызықтырды. Әрине, Құнанбай мен Абайдың арасындағы қарым-қатынасты, қанша жылдар бойы бұрмаланып, айтылмай келген ойды жаңаша көзқараспен жазып, жас ұрпаққа түсінікті тілмен беруі пьесаның құндылығын арттырды», - дейді театр сыншысы Анар Еркебай.

Сонымен қатар ол спектакль ықшамдығымен, минималистік стилімен, сценография және жарық сәулелердің дұрыс орнатылуымен көзге түскен. Оның айтуынша, режиссердің Абай өлеңдерін эпотет ретінде алуы, көрерменнің өң бойына бойлатуы да ұтымды шықты. Мұның барлығы қойылымның ажарын келтіріп тұрды.

Ал актерлер болса өз кейіпкерлерін түсініп, оны халыққа жеткізу үшін күні-түні дайындық жүргізген. Абай рөлін Сүндет Сәнсенұлы, Құнанбай рөлін Медғат Өмірәлиева сомдап шыққан.

«Ұлы Абай бейнесін сомдау – үлкен жауапкершілік. Ол үшін Абайды толыққанды зерттеп, білу керек. Абайды ойнау бір бөлек, оны жеткізу бір бөлек. Рөлді сомдауға 2 айдан аса уақыт кетті. Ал спектакль 1 аптада шыққан болатын», - дейді актер Сүндет Сәрсенұлы.

Брифингтен соң «Құнанбай мен Абай» пьесасы сахналанды. Қойылымға облыс әкімі Серікбай Трұмов келді. Ол сахналық шығармадан ерекше әсер алғанын айтып, авторға өз алғысын білдірді.

«Былтыр мемлекет басшысы Қасым-Жомарт Кемелұлы өзі бастап, ұлы Абайдың 175 жылдығы елімізде кең көлемде аталып өтті. Біздің облысымызда да ақынның шығармашылы жоғары деңгейде насихатталды. Бүгінгі Есенғали Әбдіжаппарұлы жазған қойылымы хәкім Абайдың мерейтойына ерекше сый болды. Қойылымда Абай ілімінің маңызы мен әке мен бала арасындағы рухани жақындықтың шынайы үлгісін көрдік. Міне, осындай туындыны дүниеге әкелген Есенғали Раушановқа Маңғыстау жұртшылығы атынан зор құрметпен алғыс айтамын», - деді С.Трұмов.

Жұлдызай ҚАЛИЕВА

Суреттер фейсбуктен алынды

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.