Ақтауда өткен айтыста Нұрсұлтан Оңғарбаев бас жүлде алды

Ақтауда өткен аймақтық айтысқа 12 ақын қатысып, бас жүлдені бейнеулік Нұрсұлтан Оңғарбаев алды, - деп хабарлайды mangystaumedia.kz.

Айтыс "Қайыртпай кеткен Қашаған" деп аталып, Қашаған Күржіманұлының 180 жылдығына орай ұйымдастырылды.

І-орынды Батыс Қазақстан облысынан келген ақын Мұрадым Мирланов иеленді. ІІ-орынды қарақиялық Азамат Орынбасаров пен ақтөбелік Нұрбол Жауынбаев алды, ІІІ-орын мұнайлылық Зейнетолла Қосымбаев пен айтыстағы ең жас ақын Ерсұлтан Аушановқа бұйырды.

5 сағатқа созылған сөз бәйгесіне ақын Рахат Қосбармақов, Анар Шамшадинова, Гүләйім Дәуітбай, республикалық, облыстық ақындар айтысының жүлдегерлері Фархад Мусаев пен Алтынбек Сүйінбекұлы қазылық етті.

- Ақындар бірінен-бірі асады. Шынын айтқанда кімге қандай баға берерімізді білмей ойланып қалған кезіміз де болды, - деді қазылар алқасының мүшесі, ақын Анар Шамшадинова.

- 2015 жылы «Жыр жебе» деген мектеп ашылып, алғашында Нұрлан Мұсаев басқарды. Кейін Фархад Мұсаев қолына алып, осы күнге дейін айтыскер ақындарды баптап келеді. Өңірдің ақындары биік самғағаны – екеуінің еңбегінің жемісі. Бүгінгі айтысты көріп қатты қуанып отырмыз. «Алтын домбыра» сияқты жүлделерді біздің өңірге алып келулеріңізге тілектеспіз!, - деді Ақтау қалалық мәдениет және спорт бөлімінің басшысы Болат Досов.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.